Арслантай гүүрийн нурааж, шинэчлэн барихаар болжээ. Нийслэлийн худалдан авах ажиллагааны газраас Арслантай гүүрийн шинэчлэлт, холбоос замын зураг төслийг боловсруулахаар зөвлөх үйлчилгээний тендер зарлалаа. Арслантай гүүрийг буулгаж, шинээр барин, холбоос замын зураг төсөл боловсруулах зөвлөх үйлчилгээний тендерийн нийт төсөвт өртөг нь 120 сая төгрөг юм байна. 

Тендерийг өчигдөр зарласан бөгөөд 10 дугаар сарын 20 хүртэл оролцогчдын санал хүлээн авч, тухайн өдрөө нээх аж.

Энэхүү тендерийг гурав дахь удаагаа зарлаж байгаа нь энэ юм. Өнгөрсөн зургаа, долоодугаар сард уг тендерийг зарласан ч үр дүнд хүрээгүй учраас дахин зарлаж байна. 

Арслантай гүүрийн тухай

Их хүрээний дундуур хойноосоо урагш урсаж өнгөрдөг хоёр голыг Баруун Сэлбэ, Зүүн Сэлбэ хэмээн нэрлэдэг байсан бөгөөд Улаанбаатар хотыг шинэчлэн байгуулах явцад Баруун Сэлбэ нь дарагджээ. Зүүн Сэлбэ гол XX зууны эхэн үед Сангай үйлчний, Луусангийн, Дарсны, Ногоочны, Цахарын, Амбаны гэх мэт найм орчим гүүртэй байсан бөгөөд түүний дотор Луусангийн гүүр хамгийн том нь байжээ.

Харин Амбаны хойд гүүр гэдэг нь одоогийн Арслантай гүүр бөгөөд Зүүн хүрээ Маймаа хотын зам харилцааг сайжруулах зорилгоор анх барьсан ажээ. 1946 онд баруун жигүүрийн хоёр талд нь чулуун арслан байрлуулснаар "Арслантай гүүр" хэмээх нэртэй болж, 1958 онд хуучин байсан гүүр шинэчлэгдэн 40 метр урт, 18 метр өргөн төмөр бетон гүүр болсон билээ.

Харин хоёр арслан нь анх Хүрээний манж амбан сайдын гол ордны үүдэнд байсан бөгөөд тэр газар нь одоогийн 21 дүгээр сургуулийн орчим ажээ.

Б.Хэрлэн