Улсын онцгой комиссын шийдвэрийн дагуу Нурсултан-Улаанбаатар чиглэлд үйлдсэн тусгай үүргийн нислэг 2020 оны 6 дугаар сарын 10-ны өдрийн 19:05 цагт “Чингис хаан” олон улсын нисэх буудалд газардсан.

Тус онгоцоор ирсэн нэг иргэн мэргэжлийн байгууллагын алба хаагчдын тавьсан шаардлагыг эсэргүүцэж, дур зоргоор авирлаж зорчигчдыг буулгах үйл ажиллагаанд 30 орчим минут саад учруулсан зөрчил гарчээ.

Улмаар "улаан бүс" буюу COVID-19 халдварын өндөр эрсдэлтэй байж болзошгүй бүс рүү цагдаагийн автомашин нэвтэрч зөрчил гаргасан иргэнд хяналт, шалгалт тавьж ажилласан байна. 

Иймд цар тахлын үед иргэн бүр үүрэг хариуцлагаа ухамсарлан мэргэжлийн байгууллагын тавьсан шаардлагыг биелүүлж, зүй бус авирлахгүй, хилийн чанадаас иргэдээ татан авах үйл ажиллагаанд саад учруулахгүй байхыг иргэд, олон нийтэд Мэргэжлийн хяналтын ерөнхий газраас анхаарууллаа.