Хоёр Солонгосын харилцааны гол хэрэгсэл болох шууд холбоо болон цэргийн холбооны шугамыг Хойд Солонгосын удирдагч Ким Чен Ун нээх тушаал өгсөн талаар “www.yonhapnews.co.kr” сайт мэдээллээ.

Пхеньян өнгөрсөн оны хоёрдугаар сард дээрх шугамуудыг хаасан билээ. Сөүлийн тал хоёр Солонгосын хамтарсан цогцолборыг хаасны хариуд Пхеньян дээрх шийдвэрийг гаргасан гэдгээ “KCNA” агентлагаараа дамжуулан мэдэгдсэн юм.

Шууд холбоог хааснаас болж Сөүл, Пхеньянтай холбоо тогтооход бэрхшээлтэй нүүр тулсан билээ.

Сөүлийн эрх баригчид өчигдөр албан ёсоор Пхеньяны талтай хэлэлцээр хийх санал хүргүүлсэн.

Сөүл, Солонгосын хойгийн цэрэггүй бүс болох Панмунжом тосгонд суурилуулсан шууд холбоогоор дамжин Пхеньянтай холбоо тогтоохоор ажилласаар байна. Одоогоор уг хүсэлтийн хариуг нь Пхеньян өгөөгүй байгаа ч дээрх “шугамуудаа нээсэн нь нааштай хариу өгч магадгүй гэх дохио” хэмээн Сөүлийн хэвлэлүүд мэдээллээ.

Панмунжом тосгонд энэ сарын 9-нд хэлэлцээр хийхээр төлөвлөөд буйгаа Сөүл уламжлаад байна.

Б.Дэлгэрцэцэг