Хөвсгөл аймгийн Цэцэрлэг суманд коронавирусын батлагдсан тохиолдол долоо боллоо. Орхон аймгийн лабораторид илгээсэн есөн сорьцоос долоон хүний шинжилгээний хариу эерэг гарч, халдвартай нь батлагджээ. Халдвартай иргэдийн биеийн байдал хэвийн, хоёр хүн халуурсан байдалтай байгаа аж. 

Тус аймгийн онцгой комиссоос шийдвэр гаргаж, Цэцэрлэг сумын халдвартай иргэдийг тээвэрлэн, аймгийн нэгдсэн эмнэлгийн халдвартын тасагт авчрахаар ажиллаж байна. Цэцэрлэг сум нь нийтдээ 4700 орчим хүн амтай. Тандалтаар эхний ээлжинд ойрын хавьталын 300 тэдний дам хавьтлын 200, нийтдээ 500 хүнээс маргааш шинжилгээ авна гэдгийг тус аймгийн Эрүүл мэндийн газрын дарга М.Үүрийнбаяр мэдээллээ.

Анхны тохиолдол нь Улаанбаатар хотоос хүнс тээвэрлэж очсон жолооч байсан юм.  

В.Бат