Оффшор бүсэд мөнгө угаасан гэх Элчин сайдыг АТГ-ын мөрдөгч нар илрүүлэн шалгаж буй тухай өмнө нь мэдээлсэн. Тэгвэл уг этгээд нь  Франц улсад суух Элчин сайд А.Баттөр гэдгийг эх сурвалж хэллээ.

А.Баттөр гэж хэн бэ?

Ховд аймагт 1965 онд төрсөн тэрбээр Ардчилсан намын гишүүн бөгөөд эдийн засагч мэргэжилтэй нэгэн юм. Тэрбээр 2012 оноос Батлан хамгаалахын дэд сайдаар ажиллаж байгаад 2015 онд Ерөнхийлөгч Ц.Элбэгдоржийн Аюулгүй байдал, гадаад бодлогын зөвлөхөөр томилогдон ажиллаж байсан.

Товч намтар:

Москвагийн Олон улсын харилцааны дээд сургууль, Шинэ Зеландад Викторийн их сургууль, Бельгийн Вант улсад Европын стратеги, Олон улсын харилцааны төвийг төгссөн. Хөгжлийн ухааны магистр цолтой.

ГХЯ-нд атташе, Франц улс дахь ЭСЯ-нд соёлын атташе, ЮНЕСКО-гийн Байнгын төлөөлөгчийн газарт дипломат ажилтан, ГХЯ-ны Төрийн захиргааны удирдлагын газрын захирал, 1998-2000 онд Боловсрол, соёл, шинжлэх ухаан, технологийн сайд, 2004-2006 онд Гадаад хэргийн дэд сайд, 2008 оноос Монгол Улсаас БЕНЕЛЮКС-ийн орнууд, Европын хамтын нийгэмлэгт суугаа Онц бөгөөд Бүрэн эрхт Элчин сайдаар ажиллаж байсан дипломатч юм.

Улаанбаатарт болсон Элчин сайдуудын цугларалтад ирээд байсан түүнд одоогоор хилийн хориг тавьж мөрдөн шалгах ажиллагааг эхлүүлжээ.

Б.Итгэл