Филиппинийн Ерөнхийлөгч Родриго Дутертегийн эхлүүлсэн хар тамхины эсрэг дайны улмаас 5900 хүн амиа алдаж, 40 мянган хүн баригджээ. Уг ажиллагаа өнгөрсөн долоодугаар сарын 1-нд эхэлсэн юм.

Хар тамхичдыг баривчлах нэрийдлээр цагдаагийнхныг энгийн иргэдийн эсрэг галт зэвсэг ашиглахыг зөвшөөрсөн явдлыг олон улсын байгууллагууд эрс шүүмжилж, Ерөнхийлөгчөө уг хүчирхийллээ тун яаралтай зогсоохыг шаардаж буй билээ.

Ерөнхийлөгч сэтгүүлчтэй уулзах үеэрээ “Филиппинийг хар тамхичдаас бүрэн чөлөөлөх мөн Филиппин хар тамхигүй улс болсоны дараа миний тэмцэл дуусах болно. Хүч хэрэглэхгүйгээр гэмт хэрэгтнүүдийг барих амаргүй. Би хэзээ ч энгийн иргэдийн эсрэг хүч хэрэглэхийг зөвшөөрөөгүй. Зөвхөн шаардлагатай тохиолдолд цагдаагийн ажилчдын галт зэвсэг ашиглахыг зөвшөөрсөн болно” гэж мэдэгджээ.  Амиа алдагсдын 50 хувь нь цагдаагийн гарт амиа алдсан байна.

Мөн АНУ-ын удирдлагууд Филиппинийн Ерөнхийлөгчийн нэн даруй хүчирхийллээ зогсоохыг шаарджээ. Уг мэдэгдлийн хариуд Родриго “Тусгаар улсын асуудалд бүү хошуу дүр” гэсэн аж.

Б.Дэлгэрцэцэг