Гуравдугаар сарын 11-ний өдрийн 11:00 цагийн байдлаар Сүхбаатар аймгийн Асгат суманд гарсан түймрийг цурманд оруулж, бүрэн унтраахаар ажиллаж байна. Дорнод аймгийн Хэрлэн, Булган, Сэргэлэн, Дашбалбар, Баян-Уул, Хэнтий аймгийн Батширээт, Баян-Овоо, Архангай аймгийн Хайрхан суманд бүртгэгдсэн түймрийг бүрэн унтрааж орон нутгийн холбогдох хүмүүст хүлээлгэж өгсөн. Түймрийн хохирлыг тогтоох ажлын хэсэг сум, орон нутагт ажиллаж байна. 170 орчим мянга га талбай түймэрт өртсөн. Урьдчилсан байдлаар 38 гэр, 4 чингэлэг, 4 машин, 2 мотоцикл, 48 хашаа саравч, 3706 бог, 48 бод мал, 3500 орчим боодол өвс шатсан байна. Хохирлыг тогтоох ажил үргэлжилж байна. Улсын нөөцөөс гэр ачсан цуваа зүүн гурван аймагт ажиллана.

Өнөөдрийн цаг агаарын байдлаар зүүн аймгийн нутгуудад салхитай, Сүхбаатар аймагт бага зэрэг хур тунадастай байна. Монгол орны хавар, намрын цагт гарсан түймэр маш богино хугацаанд их талбайд тархдаг онцлогтой. Учир нь салхины хурд, хуурайшилт ихтэй байдагтай холбоотой. Энэ төрлийн түймрийг хүний оролцоотойгоор унтраахад маш өндөр эрсдэлтэй байдаг.

Түймрийн эрсдэлтэй 14 аймаг байна. Бага цагт их талбайг хамардаг онцлогтой. Түймэр гарсан газарт салхины хурд 6-18 м/секунд хүртэл салхилдаг учраас түймэр унтраах ажлыг зохион байгуулахад алба хаагчдын амь насанд аюултай.

Зарим тохиолдолд алба хаагчид салхиныхаа урд түймэрт өртөж болзошгүй айл өрхүүдийг түймрээс гаргах ажлыг хийдэг. Сүхбаатар аймгийн нутгаар цаг агаарт зориудаар нөлөөлөх экспедицийн үйл ажиллагааг эхлүүлээд байна.

Улсын онцгой комисс зүүн аймгуудад гарсан түймэрт өртсөн айл өрхүүдэд гэр олгохоор шийдвэрлэжээ. Цуваа өнөөдөр /2025.03.11/ хөдөлнө гэв.

2025 он гарснаас хойш нийт 11 удаагийн ой, хээрийн түймэр бүртгэгдэж 18,880 га талбай гал түймэрт өртөөд байна. Эдгээр ой хээрийн түймрийн 90 орчим хувь нь хүний санамсар болгоомжгүй үйлдлээс үүсдэг гэдгийг мэргэжилтнүүдийн зүгээс хэллээ.

Зүүн аймгуудад тархсан түймрийн улмаас олон айл өрх гэр, мал нь шатаж, хүнд нөхцөлд байна

Тиймээс эхний ээлжид УОК-оос малчдад сэтгэлзүйн болон эмнэлгийн тусламж үзүүлэхэд анхаарч, мөн орон гэрийг нь сэргээхэд тусламж үзүүлэхээр болжээ. Тодруулбал, шадар сайд С.Амарсайханы тушаалаар түймэрт өртсөн айл өрх, иргэд, хүүхэд багачуудад эмнэлгийн тусламж үйлчилгээ үзүүлэх, орон гэр, орчны сэргээн босголтыг зохион байгуулах, сэтгэл зүйн зөвлөгөө өгөх, галд өртсөн мал сүргийг эрүүлжүүлэх, малын сэг зэмийг устгах, ариутгал халдваргүйтэл хийх, амжиргааг нь дэмжих шуурхай ажиллагааны ажлын хэсгийг өчигдөр байгуулсан байна.

Тус ажлын хэсгийг УОК-ын нарийн бичгийн дарга, хурандаа Т.Баярхүү ахалж бүрэлдэхүүнд Эрүүл мэндийн яам, Нийгмийн эрүүл мэндийн үндэсний төв, Мал эмнэлгийн ерөнхий газар, Зооноз өвчин судлалын үндэсний төв, ХХААХҮЯ, ХХЕГ, ЦЕГ, БХЯ,БОУАӨЯ ны холбогдох албаны хүмүүс болон аймаг орон нутгийн удирдлагууд орж газар дээр нь очиж ажиллана.