АНУ-ын Ерөнхийлөгч Д.Трамп өчигдөр буюу лхагва гарагт Цагаан ордны цэцэрлэгт хүрээлэнд болсон хэвлэлийн хурлын үеэр хилийн чанадаас нийлүүлж буй бүх бараанд татвар ногдуулах шийдвэрээ танилцуулсан. Энэхүү шийдвэр нь дэлхий даяар худалдааны бодлогын шинэ чиг хандлагыг тодорхойлох чухал алхам болж байна.

Ерөнхийлөгч Д.Трамп өөрийн танилцуулгадаа хоёр баганатай хүснэгтийг үзүүлсэн бөгөөд эхний баганад гадаадын улс орнуудаас Америкт нийлүүлж буй бараанд ногдуулж буй татварын хувь хэмжээг харуулсан бол нөгөө баганад АНУ-аас эдгээр улс орнуудад ногдуулж буй татварын хувь хэмжээг жагсаажээ. Энэхүү хүснэгт нь Цагаан ордны олон нийтийн сүлжээн дээр нийтлэгдсэн байна. Жишээлбэл, Хятад улсын бараанд АНУ 34 хувийн татвар ногдуулсан бол Европын Холбооны бараанд 20 хувь, Швейцарын бараанд 31 хувь, Израилын бараанд 17 хувь, Казахстаны бараанд 27 хувь гэжээ.

Хамгийн өндөр татвар нь Азийн орнуудаас нийлүүлж буй бараанд ногдсон байна. Вьетнамд 46 хувь, Камбожид 49 хувь, Лаосд 48 хувь татвар ногдуулжээ. Гэвч Оросын барааны татварын хувь хэмжээ уг хүснэгтэд тусгагдаагүй байна. Ерөнхийлөгч Д.Трамп энэхүү шийдвэрийг “дэлхийн бүх улс орнуудад харилцан татвар ногдуулахыг зохицуулсан түүхэн зарлиг” хэмээн тодорхойлсон бөгөөд, энэ өдрийг Америкийн түүхэнд хамгийн чухал өдрүүдийн нэг хэмээн онцоллоо.

Д.Трамп мөн АНУ-д нийлүүлж буй бүх төрлийн авто машины татварын хэмжээг 25 хувь болгон нэмэгдүүлэх шийдвэр гаргасан байна. Энэ татвар 4 дүгээр сарын 3-ны өдрөөс эхлэх бөгөөд, авто машины сэлбэг хэрэгслийн импортод ногдуулсан татвар 5 дугаар сарын 3-наас үйлчилж эхлэх юм. Энэ нь АНУ-ын худалдааны бодлого дахь томоохон өөрчлөлт болон гадаад худалдааны тэнцвэрийг өөрчилж болзошгүй гэж шинжээчид үзэж байна.

Ийнхүү Д.Трампын импортын татварыг нэмэгдүүлэх шийдвэр дэлхийн бүх улс орнуудад дам нөлөө үзүүлэх, худалдааны дайн дэгдээх хэмжээнд ирж байна. Учир нь АНУ-ын импортын татварын хариуд Европын холбоо, БНХАУ, Канад, Мексик харилцан татвар ногдуулах тухай мэдэгдээд байна. энэ үйл явдлаас үүдэн хөрөнгө оруулагчидтодорхойгүй нөхцөл байдалд эргэлзэж, хөрөнгийнбиржүүдийн хувьцааны ханш тогтворгүй болж байгаа юм. 

Хэрэв импортын татвар худалдааны дайн болж өргөжвөл, АНУ-д 5.5 сая ажлын байр үгүй ​​болж, ажилгүйдлийн түвшин 7% хүртэл нэмэгдэж, АНУ-ын ДНБ оргил үеэсээ 1.7%-аар буурахад хүргэнэ гэж Moody-s аналитикийн симуляци тооцоолжээ.