Б.Энхбаяр: ''7.5 тэрбум төгрөгийн авлигын мөнгө сейфэндээ хадгалж байгаад баригдсан С.Батдөл гэдэг нөхөр ШШГЕГ-ын Богд уулын амралтын газар ялаа эдэлж байна. Засгийн газар яагаад байгаа юм. Энийг амралтын газар амрааж байгаа мөнгө мэддэг сайд байна гэсэн үг. Өөрийг нь илчлээгүйн төлөө энэ хүнийг амрааж байна. Эзнийг нь олж шийтгээрэй. Эзэн нь өөрөө тодорхой байна'' гэж өчигдрийн байнгын хорооны хуралдаанаар хэлсэн. 

ШШГЕГ-ын харьяа Төр хурахын амралтад авлигын хэргээр ял эдэлж, хорих ангид хоригдож байх ёстой С.Батдөл амарч байжээ. Түүнийг ингэж амраасан хүн нь Сангийн сайд Б.Жавхлан гэдгийг ч УИХ-ын гишүүн Б.Энхбаяр өнөөдөр хэлэв.  Шүүхийн шийдвэрийн төсвийг 2025 онд нэмэгдүүлж оруулж ирсэн хүн нь Сангийн сайд Б.Жавхлан бөгөөд тэрээр авлигачин С.Батдөлтэй холбоотой гэсэн юм. Харин энэ талаар, 

ШШГЕГ-ын дарга Б.НАНДИНБОЛОР:

"Улаанбаатар төмөр зам"-ын Тээвэр зохион байгуулалтын албаны орлогч дарга асан С.Батдөлийг шүүхээс гэм буруутайд тооцож, хорих ял оноосон. 409 дүгээр хорих анги хүмүүсийн мэддэгээр хуучин эмэгтэйчүүдийн хорих ангийн суурин дээр баригдсан тус хорих ангид С.Батдөл хоригдож, ял эдэлж байгаа. Төр хурахын амралтад байсан нь үнэн. Одоо бол зоондоо ял эдэлж байгаа. Хэвлэл мэдээллийнхэн очиж үзсэн ч болно. Хуучин Баянзүрхийн товчоо гараад Ногооны зоорийн дэнжид байдаг хорих ангид С.Батдөл ял эдэлж байна.С.Батдөл 2023 оны арваннэгдүгээр сард шүүхээр таслагдаж, манай хорих ангийн мэдэлд ирсэн.

2024 оны есдүгээр сарын 29-ний өдөр Төр хурахын амралтын аж ахуй хэсэгт очсон. Яагаад гэвэл хүйтний улирал эхэлсэнтэй холбоотойгоор тус амралтын газар дөрвөн хоригдол галчаар хуваарилагдаж, харуул хамгаалалтын ажилтны үүрэг гүйцэтгэдэг. Тэр бол амралтын газар биш. Манай ахмад, өндөр настнуудыг сувилах алба хаагчдаа амраах чиглэлийн үйл ажиллагаа явуулдаг аж ахуйн тооцоот үйлдвэрийн газар гэж явдаг. Тэнд галчаар ажиллаж байсан нь хуулиар хориглосон зүйл байхгүй. Аль хоригдлыг гаргаж болно. Хуваарилалтын асуудал бол манай байгууллагын тэргүүн дэд даргын ахалсан Хорих ангид ял эдлүүлэх албаны зөвлөлөөр хэлэлцэж шийддэг зүйл. Мөн аж ахуйн хэсэгт гаргахдаа заавал прокурорын зөвшөөрөл авч гаргадаг. С.Батдөл нэг сар 20 хоног үндсэндээ Төр хурахын амралт сувилалд галчаар ажилласан юм билээ.

50 хоногийн дараа прокурорын тогтоолоор буцаагаад 2024 оны арвнэннэгдүгээр сард хорих анги руу татсан. Одоо бол хорих ангид ялаа эдэлж байгаа.