Монгол Улсын Ерөнхийлөгч У.Хүрэлсүхийн зөвлөхүүдийн тоон дотор хэд хэдэн “үсэг” бий. Зөвлөхүүдийн танилцуулга, боловсролын зэрэг, шинжлэх ухааны бүтээлүүдийг нь сөхөөд харвал “юмханаар” аргалчихсан намтартангууд ерөнхийлөгчийн институцыг чиглүүлж явна.

Ерөнхийлөгчийн зөвлөхүүд нь хэн байх нь Монголын ард түмэнд хамгийн их хамаатай. Сирийн дайн эхлэхийн өмнө Башар Аль Асадын зөвлөхүүд иргэдийн 99 хувь нь таныг дэмжиж байна гэж зөвлөөд хэчнээн жил гэмгүй ардын цус урсав. Энэ мэт муу жишгүүдийг санаж явахад гэмгүй.

Улс болж тоглож байгаа биш, бодлого тодорхойлолцох зөвлөхүүдэд боловсролын босго өндөр байх нь зүйн хэрэг.

Монгол Улсын Ерөнхийлөгчийн Эрүүл мэнд, нийгмийн бодлогын зөвлөх Б.Бадамцэцэг Батлан хамгаалах яамны хуралд сууж байгаа зураг цахим орчинд түгж олон шүүмжлэл дагуулжээ. Ямар шалгуураар Ерөнхийлөгчид зөвлөж буйд анхаарал хандуулсан нь цөөн. Анхаарал хандуулсан нь атаархагч нэр зүүж, феминистүүдэд адлуулж, жендэрт цавчуулаад өнгөрсөн.

Ерөнхийлөгчийн эрүүл мэнд нийгмийн бодлогын зөвлөх Батмөнхийн Бадамцэцэг 2010 онд Монгол, Энэтхэгийн хамтарсан сургуулийг, 2016 онд Анагаахын шинжлэх ухааны үндэсний их сургуулийг Нүүр амны их эмч мэргэжлээр төгссөн гэж намтарт нь бичигджээ.

Эрдмийн зэрэг цол хэргэм байсангүй. Судалгааны бүтээл нь “оюутан” байхдаа бичсэн дадлага, дипломын ажил бололтой хоёр “эрдэм шинжилгээний” ажил байна.

“Хүүхэд залуучууд дундах нүүрс усны хэрэглээ шүдэнд үзүүлэх нөлөө” эрдэм шинжилгээний ажил 2015 он – “Эрүүл мэнд” сэтгүүл

“Ургамлын тосоор амны хөндий зайлахад амны хөндийд гарах өөрчлөлт” эрдэм шинжилгээний ажил 2016 он“Эрүүл мэнд” сэтгүүл

Ийм ичмээр эрдэм шинжилгээний ажил намтардаа дурдсан нэгэн Ерөнхийлөгчийн эрүүл мэнд нийгмийн бодлогын зөвлөх болсоныг харахад аль ч талынх нь ичих булчирхай ажилладаггүй бололтой. Эмэгтэй хүн гэдгээр нь бус эрүүл мэнд нийгмийн бодлого гэх том институцын зөвлөх тул эрүүл шүүмж хэлье.

Ерөнхийлөгчийн Эрүүл мэнд, нийгмийн бодлогын зөвлөх Монголын хүн амын эрүүл мэндэд чиглэсэн бодлогыг тодорхойлно. Энэ чиглэлээр Ерөнхийлөгчид зөвлөх хүмүүс мэргэжлийнхээ хүрээнд  Sc.D. буюу шинжлэх ухааны докторын зэрэгтэй эрдэмтэн байх гэсэн шалгуур байдаггүй юм байх...

Шинжлэх ухааны судалгаа, аргачлал бол аливаа нийгмийн асуудал, ялангуяа нийтийн эрүүл мэндийн боловсролыг дээшлүүлж, амьдралын чанарыг сайжруулах гол үзэл баримтлал болох ёстой. Дэлхийн жишиг ч ийм л байдаг. Энэ чиглэлээр Ерөнхийлөгчийн бодлогыг тодорхойлолцох нэгэнд хүн амын эрүүл мэндийн урт хугацааны стратегийг зөв тодорхойлох наад захын чадвар, эрдэм шинжилгээний ажлуудын зузаан жагсаалт байх хэрэгтэй.

Б.Бадамцэцэг нь шүдний эмч, нийгмийн сайн үйлстэн. Орон нутгийн хүүхдүүдийн шүдийг  үнэгүй эмчлэх зэрэг олон ажил санаачлан хэрэгжүүлдэг, нийслэлийн шилдэг залуу, хөдөлмөрийн хүндэт медальтан. Гэвч хүн амын эрүүл мэнд нийгмийн бодлого бол сайн үйлсийн ажил биш. Ерөнхийлөгчийн зөвлөхүүдийн мэргэжлийн чадвар улс орны ирээдүйн хөгжил, үндэсний аюулгүй байдлын баталгаа болсон хүн амын эрүүл мэндийн суурийг тавихад хамгийн чухал үүрэг гүйцэтгэнэ.

Тиймээс Ерөнхийлөгчийн институцид ямар хүмүүс багтаж, хэн зөвлөж, хэн бодлогыг нь тодорхойлолцож, хэн хүрээлж буйд анхаарал хандуулаад үзэхэд гэмгүй.