Монгол Улсад сүүлийн 20 гаруй жил зонхилон тохиолдож байгаа зүрх судас, хорт хавдар, чихрийн шижин зэрэг халдварт бус өвчин нь нийгмийн эрүүл мэндийн тулгамдсан асуудал болж улс орон болон хувь хүн, гэр бүлд эдийн засаг, санхүүгийн дарамт үүсгэж байна. Хүн амын нийт нас баралтын шалтгааны 86%-ийг халдварт бус өвчин эзлэж, нас барсан 3 тохиолдол бүрийн 1 нь зүрх судасны шалтгаантай байна.

Улсын хэмжээнд тулгамдаад байгаа энэхүү өвчлөлийг бууруулахад ХБӨ-ний эрсдлийг эрт илрүүлж, хүндэрлээс урьдчилан сэргийлсэх алхмуудыг эрүүл мэндийн салбарын анхан шатны нэгжүүдэд хэрэгжүүлэх нь иргэдэд хүртээмжтэй, үр дүнтэй гэж ДЭМБ зөвлөдөг. Тиймээс анхан шатны ЭМБ-д зориулан ДЭМБ-аас гаргасан PEN/HEARTS арга хэмжээг үр дүнтэй хэрэгжүүлж чадвал ХБӨ-ний эрт илрүүлэг, хяналт, хүндрэлээс сэргийлэх, цаашлаад улс, нийгэм, хувь хүнд үүсэх эдийн засаг болон бусад дарамтаас хамгаалах бүрэн боломжтой гэж үзэн 2019 оноос эхлэн ДЭМБ-ын аргачлалаар “МонПЭН загвар төсөл, санаачилга”-ыг хэрэгжүүлж эхэлсэн. 

Үүнээс дүгнээд үзэхэд одоогийн байдлаар Монгол улсад 14 аймаг, 9 дүүргийн нийт 463 Өрх, Сум, Тосгоны эрүүл мэндийн төвийн 1750 эмч, мэргэжилтэнүүдийг чадавхжуулсан байна. 

Мөн 2025 оны II-III улиралд үлдсэн 7 аймгийн өрх, сум, тосгоны эрүүл мэндийн төвд нэвтрүүлэхээр зорьж байна. 

Үүнтэй холбоотойгоор 2025 оны 03 дугаар сарын 10-ны өдөр Анхан шатны эрүүл мэндийн байгууллагад түгээмэл тохиолдох Халдварт бус өвчний нэн шаардлагатай тусламж үйлчилгээний багц арга хэмжээг нэвтрүүлэх, халдварт бус өвчний эрсдэлт хүчин зүйлийг бууруулах ажлыг салбар дундын ажиллагаанд тулгуурлан сайжруулах зорилгоор уулзалт зохион байгууллаа. 

Уулзалтад тус Дүүргийн Засаг даргын Тамгын газар, Эрүүл мэндийн төв, Соёлын ордон, дүүргийн хороод, өрхийн эрүүл мэндийн төвүүд, дүүргийн Спортын хороо, дүүргийн Боловсролын хэлтэс, ерөнхий боловсролын сургууль зэрэг байгууллагын төлөөллүүд оролцлоо.