2024 онд эрчим хүчний үнэ квт тутамдаа 280 төгрөг болж нэмэгдсэн. Харин ирэх тавдугаар сарын 16-аас дулааны үнэ 85 хувиар нэмэгдэнэ. Дагаад ирэх есдүгээр сараас халуун, хүйтэн усны үнэ нэмэгдэх юм. 

Ингээд тооцвол цахилгаан, дулаан, халуун хүйтэн ус гээд төрөөс зохицуулалттай бүх үйлчилгээний тариф нэмэгдэж, өрхийн зарлагад эзлэх сарын тогтмол зарлага авч байгаа дундаж цалинтайгаа харьцуулахад байж болох дээд  түвшиндээ хүрч нэмэгдэнэ. 

2025 оны нэгдүгээр сард инфляц хотод 9, орон нутагт 9.7 хувьтай байсан. Инфляц зорилтот түвшнээс өндөр гарахад эрчим хүчний үнэ, импортын хүнсний бараа, мөн мах, сүү, гурилын үнийн өсөлт голлон нөлөөлсөн. Одоо үүн дээр дулаан, усны үнэ нэмэгдвэл инфляц 11 рүү орох магадлал өндөр байна. 

Хэдийгээр хоёрдугаар сард Засгийн газраас цахилгааны шөнийн тарифын үйлчлэх хугацаа, хэмжээн дээр өөрчлөлт оруулсан ч энэ төдийлөн бүх айлд хамааралтай эерэг үр дагавар авчирч чадаагүй. 

Иргэдэд өрхийн орлогоо нэмэгдүүлэхийн тулд давхар ажил хийх эсвэл хэрэглээгээ хумих гэсэн сонголт л үлдэж  байна.