Монголын Олон улсын ба Үндэсний спортын арбитрын давж заалдах комиссын бүрэлдэхүүн Улсын арслан М.Бадарчийн сэргээшийн асуудлаар эцсийн шийдвэр гаргахаар хуралдаж байна. Тус асуудлаар шинэ нөхцөл байдал үүсэж, гэрч гарч ирсэн талаар Спортын арбитрын шүүхээс танилцууллаа.

Нэрээ нууцлахыг хүссэн гэрч давж заалдах комисст хүсэлт гаргасан байна. Тэрбээр хүсэлтдээ “Миний бие эрүүл мэндийн шалтгааны улмаас 2023.06-09 дүгээр сарын хооронд өөрийн биеийн онцлогийг харгалзан үзэж, Турк улсаас биеийн эрч хүч сэргээдэг, тестостероны тэнцвэртэй байдлыг хангахын тулд метаналь бодис орсон 50 ширхэг бэлдмэлийг өдрийн 2-оор ууж хэрэглэсэн. Хэрэглэж байх хугацаандаа зүрхний эм панангинтай андуурч, Бадарчид өгсөн байж болзошгүй гэж үзэж байна. Тиймээс эргэлзээтэй асуудлыг шийдэх зорилгоор гэрчээр оролцох хүсэлтийг гаргаж байна” гэдгээ илэрхийлж, эмнэлгийн бичиг, эмийн зургийг хавсарган ирүүлжээ.

Мөн гэрч хаалттай мэдүүлэх өгөх хүсэлт гаргасан байна. Давж заалдах комиссын бүрэлдэхүүн гэрчийг хуралдаанд оролцуулахаар шийдвэрлэсэн бөгөөд баяр наадам зохион байгуулагчид буюу хариуцагч тал нээлттэй мэдүүлэг авахыг хүссэн бол нэхэмжлэгч Улсын арслан М.Бадарчийн тал хаалттай явуулах хүсэлт гаргалаа.

Үүнээс үүдэн комиссын бүрэлдэхүүн түр засварлан, зөвлөлдөж, гэрчээс нээлттэй мэдүүлэг авах шийдвэр гаргалаа.

Гэрч: Хэдийгээр нэг хүний асуудал боловч улс орны нэр хүндтэй холбоотой асуудал болон даамжирч байгаа учраас би иргэний үүргээ биелүүлж, үнэнээ хэлэхээр гэрчээр оролцох хүсэлт гаргасан.

Би тестостерон нэмэгдүүлдэг дааврын эм уудаг. Би тамирчин биш ч бэлтгэл хийдэг. 2023 оны 5, 6, 7, 8 дугаар сард уугаад 10 дугаар сард тестостероны шинжилгээ өгсөн. Хэвийн түвшинд хүрсэн байсан.

Би М.Бадарчтай хамт бэлтгэл хийдэг байсан. Тухайн үед М.Бадарч надаас “Танд панангин байна уу” гэсэн. Би эмийн савнаасаа гаргаж өгсөн. Дааврын эм маань панангинтай адилхан, цагаан эм. Би тухайн үед анзаараагүй, М.Бадарч ч санаандгүй хэрэглэсэн.

Би энэ асуудалд заавал оролцох шаардлагатай биш. Гэвч бөхчүүд муудалцаж, ард түмэн талцсан үл ойлголцлыг шийдэхээр ирсэн. Надад өөрөөр ашиг сонирхол байхгүй.

Нэхэмжлэгч тал: Та Бадарчид хэдэн ширхэг эм өгсөн вэ?

Гэрч: Би 10-аад ширхгийг өгсөн. Тухайн үед Бадарч 2-ыг уугаад, үлдсэнийг нь далд хийсэн байх. Угаасаа панангин ууж байсан юм байна лээ.

Арбитр: Баяр наадмын дараа Бадарчаас сэргээш илэрч, эрхийг нь хаслаа гэсэн мэдээлэл гарсан. Та тэр үед яагаад гарч ирээгүй вэ?

Гэрч: Би мэдээгүй. Би сая долоо хоногийн өмнө мэдсэн.

Арбитр: Та юуг нь сая мэдсэн вэ?

Гэрч: Эмээ захихдаа тэр бодис илэрснийг мэдсэн.

Нэхэмжлэгч М.Бадарч: Тухайн үед миний эм дууссан байсан. Тэгээд энэ ахаас панангин байна уу гээд хэдийг авсан.

Арбитр: Та өгсөн эмийг нь уусан уу?

М.Бадарч: Панангин гээд уугаад байсан

Арбитр: Хэдэн удаа уусан вэ?

М.Бадарч: 3, 4 хоног уусан байх

Арбитр: Бүгдийг нь ууж дуусгасан уу?

М.Бадарч: Бүгдийг нь ууж дуусгасан. 

Арбитр: Энэ хүн үнэн ярьж байна уу?

М.Бадарч: Үнэнээ ярихаар л өөрөө ил гарч ирсэн байх. Би ямар авчирсан биш.

Гэрчээс тайлбар авсны дараа Монголын Олон улсын ба Үндэсний спортын арбитрын допингийн давж заалдах комисс зөвлөлдөж, шийдвэрээ гаргалаа. Тус комисс Үндэсний баяр наадам зохион байгуулах хорооноос гаргасан улсын арслан М.Бадарчийн барилдах эрхийг 4 жилээр хассан шийдвэрийг хэвээр үлдээлээ.

Мөн допингийн эсрэг зөрчлүүдийг Дэлхийн допингийн эсрэг байгууллагад хүргүүлэхээр болов.

Б.Хэрлэн