Өмгөөлөгч Г.Батбаяр нь сураггүй алга болж, эрэн хайж байсан бөгөөд түүнийг амь хохирсон байдалтай байхад нь Хан-Уул дүүргийн 22 дугаар хорооны нутаг дэвсгэрт байрлах "Богд хаан" амралтын газрын автомашины зогсоолд байрлуулсан автомашинаас нь олж тогтоогоод байгаа билээ.

Тэгвэл эл хэргийн талаар ЦЕГ-ын Урьдчилан сэргийлэх газрын Хэвлэл мэдээлэл, олон нийттэй харилцах хэлтсийн дарга, цагдаагийн дэд хурандаа Г.Пүрэвдэлгэр мэдээлэл өглөө. 

Түүний хэлснээр иргэн Б нь гэрээсээ гараад ор сураггүй алга болчихлоо гэсэн гомдол мэдээллийг дүү Н нь Чингэлтэй дүүргийн цагдаагийн байгууллагад өгсөн. Мэдээллийн дагуу иргэн Б-г эрэн хайх ажиллагааг явуулсны хүрээнд ХУД-ийн нутаг дэвсгэр Богдхан уулын амралтын газрын машины зогсоол дээрээс өөрийнх нь эзэмшлийн машин дотроос амь хохирсон байдалтай байхад нь олсон. Амь хохирогч өөрийн эзэмшлийн машиныхаа арын суудал дээр нас барсан байсан. Машинаас өөрийнх нь эзэмшдэг буу, сум, хонгио, гар утас олдсон. Харин гэрээслэл олдоогүй гэв. Мөрдөн шалгах ажиллагааны хүрээнд Б нь галт зэвсэг ашиглах сургалтанд хамрагдсан. 

Мөн иргэний нийгмийн байгууллагууд болон ар гэрийнхэн нь нийгэмд буруу ташаа мэдээлэл өгөөд байна. Шүүх шинжилгээний задланг мэргэжлийн шинжээчид прокурорууд дуу дүрс, гэрэл зургаар баримтжуулж хийсэн. Ямар нэгэн хууль зөрчсөн хууль бус үйлдэл байхгүй. Одоогоор гэрчүүдээс мэдүүлэг авах, амь хохирогчийн явсан газрын камеруудыг хураан авч шалгах ажил үргэлжилж байна. 

Энэ хэрэгт амь хохирогчийн төрсөн дүү Н-ийг хууль ёсны төлөөлөгчөөр сонгож, мөрдөн шалгах ажиллагаа болон задлан шинжилгээний дүнг хууль заасан дүрэм журмын дагуу танилцуулсан байгаа юм байна. Шинжээч томилох тогтоолыг хүртэл танилцуулсан. Ямар нэгэн хууль зөрчсөн зүйл огт байхгүй гэлээ.