ХҮН намаас залуус нь татгалзаж гарах өргөдлөө өгч эхэлжээ. Өчигдөр гэхэд Намсрайжавын Энхчимэг гэх эмэгтэй ХҮН намын дарга Т.Доржхандын өрөөнд орж, намаас гарах өргөдлөө өгчээ.

Тэрбээр "Намаас гарах өргөдлөө өглөө. Залуусын итгэл сэтгэлийг улс төрийн хөзөр болгож байгаа ХҮН намын дарга Т.Доржхандыг эсэргүүцэж байна. Гурван жил хангалттай намдаа хүчин зүтгэлээ. Итгэл сэтгэл зоригоороо ажиллалаа. 2020 онд гишүүн болж орсон. Улс эх орныхоо төлөө гэж орж байснаас нэг хүний компанит ажилд орж байгаагүй юмаа. Энэ олон сайхан залуучууд улс орныхоо асуудлыг шийдвэрлэхээр орж ирж байхад улстөрийн хөзөр болгож ашиглаж байгаа Доржхандыг эсэргүүцлээ. Энэ хүмүүстэй ярих зүйл байхгүй. Эцсийн эцэст Доржхандын намд ороогүй юм шүү. АН болоод МАН-г сонгох шаардлага байхгүй байсан учраас ХҮН намыг сонгосон байсан.

Харамсалтай нь дарга нь залуусын итгэл сэтгэлийг хөсөрдүүлж, МАН-ын хүүхэлдэй болж явж байсан. Үүнийг эрт мэдэж байсан, баталгаатай баримт байгаагүй. Надад ямар ч итгэл алга. ХҮН намд маш олон сайхан залуус байгаа. Тэдэнд маань сонгогдох боломж алга. Нэг хүнд таалагдаж байж улстөр нь явах юм байна. Шударга хүмүүсийг хавчдаг юм байна, Намын дүрэм нь хүртэл ардчилсан биш. Бараг чи аядуу зөөлөн бай гээд үгийг нь хэлүүлдэггүй юм байна. ХҮН намын нэр хүнд дээгүүр байгаа гэнэ. Надад тэр хамаагүй. Улс орны эрх ашгийг номер нэгт тавьж чадахгүй байгаа байдлыг таслан зогсоох ёстой. Монголд хулгайч авлигачид ихэдсэн болохоос багадаагүй. Улстөрд удсан хүмүүс аймшигтай болчихсон байдаг юм байна. Намд байгаа мянга мянган зөв сэтгэлтэй залуустаа хандаж хэлэхэд та нар зоригтой байгаачээ. Дарга нарыг долоогоод долигноод байвал улс орон өөрчлөгдөхгүй шүү.

Миний тэвчээр барагдлаа. Надад гараад явахад амархан байсан ч энэ нам засагдах боловуу дүрмээ өөрчлөх болов уу, ардчилсан байх болов уу гэж харж байлаа. Гэтэл уучлаарай тийм байх боломжгүй юм байна. Миний эгдүүцэл зэвүүцэл хүрч байна. Хүнийг үл тоомсорлож, хүний итгэл зоригоороо тоглож дарж болдог юм байна, харлаа. ХҮН намыг арай ч ийм гэж бодоогүй. Хурал болгон дээр Энхчимэгээс өөр ардчилсан байдлаар үгээ хэлдэг хүн байхгүй дээ. Ичихгүй гэвэл Дээд шүүх дээр байгаа намынх нь их хурал, намынх нь дүрмийг татаад хараарай. Ерөөсөө ардчилал үнэртэхгүй дээ. Муухайгаар хэлэхэд энэ улсыг цөлмөж идэхийн тулд эрх мэдэлд хүрэхийн тулд эд нар ямар ч хамаагүй аргаар явж байна" гэлээ.