ОХУ-ын газрын тосны үйлдвэрүүдийн дунд томоохонд тооцогддог, тус улсын нийт газрын тосны боловсруулалтын таван хувийг хангадаг Нижегородын газрын тос боловсруулах үйлдвэрт гарсан ослоос үүдэлтэй үр дагаврыг арилгах үүднээс  Оросын эрх баригчид шуурхай арга хэмжээний багц боловсруулан гаргахаар бэлдэж байгаа гэнэ. Энэ талаар Москва таймс сонин мэдээлжээ.

“Лукойл” компанид харьяалагдаж, Москвагийн бүс нутгийн түлшээр хангадаг  энэ үйлдвэрийн газрын тосны боловсруулалтын чухал үүрэг гүйцэтгэдэг тоног төхөөрөмж эвдэрсний дараа Оросын Засгийн газар бензиний экспортыг түр хугацаагаар хойшлуулах боломжийг авч хэлэлцэж байгаа гэнэ.

Интерфакс сонинд мэдээлэл өгсөн эх сурвалжийн өгүүлснээр, бензиний экспортыг түр хугацаагаар хорих асуудлыг Засгийн газар дээр хэлэлцэж байгаа бол Оросын Эрчим хүчний яам холбогдох эрхзүйн актыг бэлтгэж байгаа аж.

Өөр нэг эх сурвалжийн өгүүлснээр, дотоодын зах зээл дээр түлшний хомсдол үүсгэхгүйн тулд Эрчим хүчний яам боломжит бүх хувилбарыг авч үзэж байгаа гэнэ.

Нижегородын газрын тос боловсруулах үйлдвэр дээр нэгдүгээр сарын дөрөвний өдөр компрессорын тоног төхөөрөмж эвдэрсэн аж. Энэ тоног төхөөрөмж нь гадаадад үйлдвэрлэгдсэн төхөөрөмж байсан бөгөөд Оросын гаезрын тосны салбарын эсрэг тавьсан барууны хоригийн улмаас энэ төхөөрөмжийг ойрын хугацаанд солих, шинэчлэх боломжгүй гэнэ.

Ройтерс агентлагийн мэдээлснээр, компрессорын тоног төхөөрөмж эвдэрснээр, үйлдвэрлэлийн гарц хоёр дахин буурч, тэр дундаа өндөр октант түлш болох АИ-95, АИ-98 бензиний үйлдвэрлэл эрс буурах аж.

Ингэснээр үйлдвэр энэ төрлийн бензин худалдаалахаа зогсоож, харин үйлдвэрийн эзэн Лукойл компани эзэмшлийнхээ ШТС-уудыг хангахын тулд бусад үйлдвэрүүдээс бензин худалдан авах шаардлага үүсэх юм байна. Энэ нь цаашлаад бензиний эрэлт, нийлүүлэлтэд шууд нөлөөлж, хомсдол үүсэж болзошгүй гэж таамаглаж байгаа аж.

Эргэн сануулахад, ОХУ 2023 оны есдүгээр сарын 21-ний өдрөөс эхлэн моторын түлшний экспортод хориг тавьж байлаа. Дотооддоо үнийг хазаарлах, хомсдолыг арилгах зорилгоор тавьсан энэ хоригийг дараа нь хэсэгчлэн сулруулж, улмаар дотоодын зах зээл ханасны дараа, 11 дүгээр сарын 17-ны өдөр хоригийг бүрэн цуцалж байв.

Г.Бямбасүрэн