Монгол Улс 2023-2025 оныг “Монголд зочлох жил” болгон зарлаж, энэ жил нэг сая жуулчин хүлээж авахаар төлөвлөөд буй. 
Монголчуудын хувьд зуны улирал гэлтгүй өвлийн улиралд утаа тоосонцроос холдож, цэвэр агаарт цаашлаад дулаан орныг зорих нь элбэг байдаг. Гэтэл зун болон өвлийн улиралд зарим жуулчны баазын үйлчилгээ болоод үнэ тэнгэр газар шиг ялгаатай байдаг гэдгийг иргэд хэлж байна. Түүнчлэн дотооддоо аялах зардал жилээс жилд өсч байгаа нь цаашлаад дотооддоо биш гадаадад аялах хөшүүрэг болж байгаа гэдгийг хэлж байсан юм. 

Иргэн: Өнгөрсөн зун дотооддоо гэр бүлээрээ аялаад ирсэн. Байршлаасаа хамаараад үнэ мэдээж өөр байсан. Бидний төсөв арай хийж л хүрсэн. Бид гурвуулаа Хөвсгөл далайгаар аялаад ирэхэд хамгийн багадаа 1.5-2 сая болж байгаа юм. Ихэнх тохиолдолд машиндаа хоносон. Тэгэхээр байшин эсвэл гэр түрээслэх юм бол бидний мөнгө дээшээ талийж өгөх байсан. Иймд арай жоохон илүү мөнгө төсөвлөөд гадагшаа аялах хүсэл төрсөн. Манай орны байгаль хичнээн сайхан ч гэсэн аялал жуулчлал тал дээрээ хараахан хөгжөөгүй болохоор жил бүр аялах хүсэл төрөхгүй шүү дээ. 

Дотоодын аяллын өртөг өндөр учраас иргэд Хайнань, Бали руу аялах урсгал нэмэгджээ. Өвлийн улиралд давхардсан тоогоор НЭГ САЯ иргэн гадны аль нэг улс руу явжээ.

Иргэн: Хамгийн сүүлд гэр бүлээрээ Хөвсгөл, Архангай, Өвөрхангайн нутгаар аялаад ирсэн. Үйлчилгээ нь яг хэвээрээ хэрнээ үнэ нь нэмэгдсэн байсан. Зарим тохиолдолд дотоодод аялахаас илүү гадаад аялах нь хямд санагдаж байна. Монголын аялал ер нь үнэтэй. Гол нь үнэ хөлсөндөө таарсан чанартай үйлчилгээ байдаггүй. Дотооддоо буюу Улаанбаатар хотоос хамгийн ойр Горхи Тэрэлжийн цогцолбор газарт энгийн гэрт нэг хонох зардал нь байрлах өртөг, хоол унд нь ороод 500 мянган төгрөг орчим болж байна. Гэтэл Манжуур руу хоёр өдөр, гурван шөнө аялахад 550 мянган, Хөх хот руу 650 мянган төгрөгийн өртөгтэй байна.

Аялагч Со Мин Жэ: "Монгол визгүй болчихсон болохоор очиход их хялбар байсан.Өмнө нь зөндөө Монголд очъё гэж боддог байсан ч боломж гардаггүй байсан л даа. Монгол улсын онгон догшин байгалийг мэдэрмээр санагдаад ямар ч эргэлзээгүй явмаар байсан. Монголын байгаль, тал хээр нутаг үнэхээр гайхалтай. Би их олон км цаадхыг хүртэл харах боломжтой байсан. Цээж дүүрэн амьсгална гэдгийг Монголд л мэдэрсэн. Хамгийн эхэнд найзуудтайгаа хамт хөтөлбөртэй аялалаар л явах сонирхолтой байсан. Гэхдээ зарим талаараа үйлчилгээ, үнийн асуудал тулгарсан. Хамгийн хэцүү нь ариун цэврийн асуудал байсан. Гэхдээ жижиг зүйлсээ шинэчлээд янзлах юм бол үнэхээр олон хүн жил болгон аялах байх" хэмээн сэтгэгдлээ хуваалцсан юм.