ААН-үүд ойр орчмын 50 метрийн цасаа цэвэрлэх үүрэгтэй ч тэр бүр цэвэрлэхгүй байгаагаас үүдэн иргэд халтирч гэмтэх тохиолдол сүүлийн өдрүүдэд эрс нэмэгджээ. Зөвхөн баярын өдрүүдэд л гэхэд Гэмтэл согог судлалын үндэсний төвөөс 1262 хүн тусламж, үйлчилгээ авсны 250 нь халтиргаа гулгаанаас үүдэлтэй гэмтэл, бэртэл авсан талаар мэдээлсэн. Мөн ГССҮТ-ээс тусламж үйлчилгээ авсан хүмүүс цаг хугацаа, эмчилгээний төлбөрөөс эхлүүлээд олон талаараа хохирч байгаагаа ярьж байсан юм. 

 Иргэн Х.Алтантуяа "Би хотын төвөөр явж байгаад хальтраад уначихсан. Одоогоор гар хөлөө гэмтээсэн боолтоо солиулах гээд ирж байгаа минь энэ. Хальтирч бэртээд ирж байгаа иргэдийн дийлэнх нь бага насны хүүхдүүд, ахмад насны хүмүүс байна. Бага насны хүүхдүүдийн хувьд хальтиргаатай замд машинд дайруулж зам тээврийн осолд өртөж бэртсэн тохиолдол маш их гарч байна. Хальтирч унасан иргэдийн хувьд гар, хөлөө гэмтээсэн, мөн битүү гэмтэл авсан тохиолдол их харагдлаа. Уг нь Аж ахуйн нэгжүүд орчныхоо 50 метр хүртэлх газрын цас, халтиргаа гулгааг цэвэрлээгүй бол хариуцлага хүлээх ёстой. Гэтэл бид зөвхөн өөрсдийн мөнгөөр эмчилгээ хийлгэж байна шүү дээ. Энэ журам нь яг хэрэгждэг юм уу" гэсэн юм. 

Хүйтний улирал эхэлж замын хальтиргаа гулгаа ихэссээр байна. Иймд байгууллагууд өөрийн эзэмшлийн зам, гаднах талбайн цэвэрлэгээг тогтмол хийж цас мөсөө тухай бүрт нь арилгах, хальтиргаа гулгаанаас сэргийлж иргэдийн зорчих аюулгүй орчинг бүрдүүлэх журмыг мөрдөх шаардлагатай байдаг юм. Тэгвэл зарим аж ахуй нэгжүүд энэхүү журмыг мөрдөхгүй байгаа нь тохижилт үйлчилгээний ажилтануудад ачаалал нэмэхээс гадна иргэдэд хүндрэл учруулсаар байна. Цаашид хүйтний эрч чангарч цас ихээр орох тул байгууллагууд өөрийн эзэмшлийн 50 хүртлэх метр талбайг цэвэрлэж хальтиргаа гулгаанаас сэргийлэх шаардлагатай.

Аж ахуйн нэгжүүд орчныхоо 50 метр хүртэлх газрын цас, халтиргаа гулгааг цэвэрлээгүй бол хариуцлага хүлээх ёстой. 2009 онд батлагдсан Хог хаягдлын тухай хууль, Захиргааны хариуцлагын тухай хуулийн 38.2-т “...гаднах орчныхоо халтиргаа гулгаатай талбайг цэвэрлээгүйн улмаас иргэд бэртэж гэмтвэл эмнэлэг, эмчилгээний зардлыг тухайн байгууллага хариуцна” гэсэн заалт бий.

Тэгэхээр орчныхоо халтиргаа гулгааг цэвэрлээгүйн улмаас хэн нэгэн халтирч унан, гэмтэж бэртсэн тохиолдолд тухайн аж ахуйн нэгж эмчилгээний зардал, олох байсан орлого зэрэг бүх нөхөн төлбөрийг төлнө гэсэн үг.

Зөвхөн шат, үүднийхээ хэсгийг биш орчныхоо 50 м газрыг цэвэрлэж, халтиргаа гулгааг нь бүрэн хариуцах ёстойг аж ахуйн нэгжүүдэд дахин сануулъя.