Өнгөрсөн сард Данид гаргасан хиймэл оюун ухаан аливаа хүний зан байдлын хэв шинжийг оновчтой таамаглахын дээр хэдэн насандаа нас барахыг ч тооцоолж чаддаг талаар ВВС агентлаг мэдээлжээ. 

Эх сурвалжийн мэдээлснээр, life2vec сайт хүний зан байдлын хэв шинж болон хэд наслахыг таамаглаж чаддаг гэнэ. Хиймэл оюун ухааныг боловсруулагчид энэ алгоритм суралцах явц болон хэрхэн ажилладаг талаар Nature сэтгүүлийн 12 дугаар сарын дугаарт нийтлүүлжээ. 

Зохиогчдын онцолж байгаагаар ямар ч ид шид, эсвэл зөгнөл байдаггүй аж. Дэлхийн зургаан сая хүний тухай статистик мэдээллийг цуглуулж, компьютер анализ хийсэн асар өргөн цар хүрээтэй мэдээллийн сан дээр суурилан хиймэл оюун ухаан хүний насыг тодорхойлдог гэнэ. Тэр дундаа, Үндэсний статистикийн газрын мэдэлд байх хувь хүний болон эрүүл мэндийн мэдээлэл дээр тулгуурлан тооцоолол гаргадаг юм байна.

Программыг боловсруулсан гол мэргэжилтнүүдийн нэг, Данийн Техникийн их сургуулийн профессор Сюне Леманы өгүүлснээр, аливаа хүний амьдралын түүх нэг нь нөгөөгийнхөө араас үргэлжлэх үйл явдлын гинжин хэлхээ шиг байдаг гэнэ.

Ийм гинжин хэлхээ мэт олон сая үйл явдлыг ажиглан, хиймэл оюун ухаан давтагдаж буй амьдралын үйл явдлууд, ямарваа нэг зүй тогтлыг анзаарч, өөрчлөлтүүдийн чухал хүчин зүйлсийг тодорхойлох бөгөөд эдгээрийн дунд боловсролын түвшин, орлогын түвшин болон архаг хууч өвчин гэсэн гурван үндсэн хүчин зүйл багтдаг аж. Ингээд анализ хийх явцад илэрсэн уялдаа холбоог аливаа үйл явдал өрнөх магадлалыг таамаглах, тэр дундаа хэдэн насандаа нас барж магадгүй талаар таамагладаг байна.

Зохиогчдын өгүүлснээр, зарим хүмүүсийн хувьд нас барах магадлал өндөр гэж хиймэл оюун ухаан тодорхойлсны дараа үнэхээр л тэдгээр хүмүүс бие барсан аж. Бага магадлалын бүсэд автомашины осол зэрэг шалтгаанууд багтах бөгөөд ийм эрсдэлүүдийг урьдаас тооцоолох боломжгүй байдаг гэнэ. Судлаачдын өгүүлж байгаагаар, энэ программыг Данид л ашиглах нь зүйтэй, учир нь чухамхүү энэ улсын стаститик мэдээллүүдийг ашигласан тул Данийн нийгмийн нөхцөл байдлын үзүүлэлт гэж харах ёстой, өөр орны иргэдэд ашиглахад тохиромжгүй аж. 

Г.Бямбасүрэн