Чингэлтэй дүүргийн гуравдугаар хороонд байрлах Нийслэлийн өмчийн гуравдугаар байр буюу Урт цагааны барилгыг нурааж, цэцэрлэгт хүрээлэн байгуулах, эсвэл дахин төлөвлөж барилга барихаар өнгөрсөн 11 дүгээр сары 3-10-ны хооронд иргэдээс санал авч дууссан. Санал асуулгын дүнд иргэдийн 96 хувь нь Урт цагааны барилгыг нураахыг дэмжсэн байна. 

Урт цагаан үйлчилгээний төвд үйл ажиллагаа явуулдаг иргэн ААН-үүдийг 12 дугаар сарын 19-ны дотор барилгыг чөлөөлөхийг шаардаж нийслэлийн өмчийн харилцааны газраас мэдэгдэх хуудас хүргүүлсэн. Улмаар тог цахилгааныг нь хязгаарлаж, үйл ажиллагаа явуулахыг нь хориглосон ч одоогоор 10 гаруй иргэн мотор асааж ажиллаж байна. Хэдий тус бүсэд байрлаж байсан нэгдүгээр корпусын барилгыг буулгаж, түр хашаагаар хамгаалсан байдалтай байсан бөгөөд өчигдрөөс /2023.12.29/ бусад корпусыг буулгах ажлыг эхлүүлсэн билээ. 

Тус барилгад үйл ажиллагаагаа зогсоохгүй явуулж буй зарим иргэдийн байр суурийг тодрууллаа. 

Иргэн: н.Алтантуяа: "Бид энэ урт цагаанд хөрөнгө оруулсан хүмүүс. Энэ газрыг нураалаа гэхэд бидэнд байр гаргаж өгөх ёстой шүү дээ.  Өвлийн хүйтэнд дулаан таслах нь хүнлэг бус хандаж байгаагийн шинж. Одоо бид тог цахилгаангүй, мотор ажиллуулж өдөр хоногийг өнгөрүүлж байна. Хэдий цэцэрлэгт хүрээлэн байгуулна гэж байгаа хэдий ч энд ажиллаж байгаа олон мянган хүний амьдралыг хохироож байна. Урт цагаан үйлчилгээний төв гурван жил өмчлөлийн маргаантай явж байна" хэмээн ярьж байв. 

Дархан Б.Занабазар "Монголын анхны хоршоологчдын хөрөнгөөр баригдсан “Урт цагаан” үйлчилгээний төвийн халуун, хүйтэн ус, дулаан, цахилгааныг 2020 оны гуравдугаар сараас хойш таслаад өдийг хүрлээ. Ус, цахилгаанаар хангах боломжтой ч зориудаар үйл ажиллагааг нь зогсоохын тулд таслаад байна.  Бидний барилга байгууламж муудсан нь үнэн. Үүнтэй санал зөрөхгүй. Гэхдээ энд өчнөөн олон зуун хүний ажлын байр бий гэдгийг нийслэл маань авч хэлэлцэхгүй байна.

Өнөөдрийн байдлаар 30 гаруй аж ахуй нэгж, 200 гаруй түрээслэгчид энэ төвд үйл ажиллагаа эрхэлж байгаа. Бид шат, шатны байгууллагад гомдол гаргаж, хүсэлтээ тавьсаар дулаанаа эргүүлэн аваад гэрээнийхээ дагуу төлбөрөө төлж байгаа. Мөн цахилгааны төлбөр тооцоогоо барагдуулж, цахилгаантай болсон. Нийслэлийн зүгээс ямар шийдвэр гаргаж, эдгээр бизнес эрхэлж буй иргэдийг ажлын байраар хангах эсэх нь одоог хүртэл тодорхойгүй байна. Шүүхийн маргаантай шийдвэр гараагүй байхад л манай төвийн үйл ажиллагааг тасалдуулахын тулд янз бүрийн алхмуудыг хийж байна. Яагаад бизнес эрхлэгчидтэй уулзаж, хамтарсан гэрээ хэлэлцээр хийж болохгүй байгаа юм бэ? Энэ газар дээр юу барьж, ашиглахаа тодорхой танилцуулаад, бизнес эрхлэгчдэд өөр газар шинэ ажлын байр гаргаж өгөх юм уу, эсвэл энд шинэ баригдах газартаа байр гаргаж өгөх юм уу гэдгээ тодорхой ойлгомжтой тайлбарлах хэрэгтэй" гэж ярьж байсан юм.