Баянгол дүүргийн 6 дугаар хороо 10 дугаар хороолол ….. шатахуун түгээх станцаас хойшоо явах далангийн замд машин унасан байна гэх дуудлага, мэдээллийг 2023 оны 12 дугаар сарын 16-ны 04:21 цагт хүлээн авч, тус дүүргийн Замын цагдаагийн хэлтэс шалгаж байна.

 “Lexus HS250h” автомашины жолооч Б нь “0.88” хувийн согтолттой автомашин жолоодож яваад зорчих хэсгийн хажуу руу онхолдсон байна. Жолооч ноцтой бэртэж гэмтээгүй аж.

Тэрбээр согтуугаар 3, 4 дүгээр хорооллын автобусны эцсийн буудлаас осол болсон газар хүртэл 3 км зайд машин жолоодсон байна.

Цагдаагийн байгууллагаас энэ талаар байнга сэрэмжлүүлэг, зөвлөмж өгч, хариуцлага тооцож байгаа боловч энэ мэт архи, согтууруулах ундаа хэрэглэсэн үедээ тээврийн хэрэгсэл жолоодсон зөрчил тасрахгүй, улмаар өөрт болон бусдад аюултай нөхцөл байдал үүсгэж байгааг анхаарч, эрхэм жолооч Та согтуу битгий хэл эрүүл явахад хүндрэлтэй байгаа энэ үед хууль, журам, ёс зүйгээ чанд сахиж, замын хөдөлгөөний дүрмээ мөрдөж зорчихыг дахин дахин зөвлөж байна.