Энэ сарын 13-ны өдөр Оросоос нийлүүлэх цахилгаан эрчим хүчийг хязгаарлахаар болсон мэдээлэл гарч, дээр дооргүй сандралдаж өнгөрүүлсэн. Тухайн үед Диспетчерийн үндэсний төвөөс гаргасан мэдээлэлд "12 дугаар сарын 13-ны өдрөөс эхлэн оргил ачааллын үед тодорхойгүй хугацаагаар цахилгаан хязгаарлаж болзошгүй" гэсэн мэдээллийг өгсөн бол Эрчим хүчний сайд Б.Чойжилсүрэн сайд ч "түргэн авч", Засгийн газрын ордонд сэтгүүлчдэд мэдээлэл өгч байлаа. 

Энэ мэдэгдэлдээ тэрбээр " Тэрбээр “ОХУ-ын эрчим хүч нийлүүлэгч ИнтерРАО компаниас 2023.12.12-ны өдрийн 16 цагт Монгол Улсын Диспетчерийн үндэсний төвд мэдээлэл ирүүлсэн. 2023.12.13-ны өдрөөс эхлэн ОХУ-аас нийлүүлж байгаа цахилгаан эрчим хүчний 345  МВт хэмжээг 150  МВт болгон бууруулж, энэ хэмжээнээс хэтрүүлэхгүй талаар бичгээр болон амаар мэдээлсэн" хэмээсэн юм. Ингээд "12 дугаар сарын 13-ны өдрөөс ЭХЛЭН, ойрын үед" зэрэг үгс ашигласан нь тодорхойгүй хугацаагаар, урьдчилан хэлэх боломжгүй үед цахилгаан хязгаарлах нь гэсэн ойлголтыг иргэдэд төрүүлж, улмаар иргэд лаа шүдэнз, газан плитка, газ нөөцөлж эхэлж байв. 

Мөн өдрийн үдээс хойш өөр нэг сүржин мэдээлэл гарсан юм.

Энэ мэдээлэлд "ОХУ-аас Монгол Улсад нийлүүлэх цахилгаан эрчим хүчийг ойрын үед хязгаарлахгүй болсныг Монгол, Оросын Засгийн газар хоорондын комиссын Оросын хэсгийн дарга А.А.Козлов мэдэгдлээ. Хоёр улсын Засгийн газар хоорондын комисс энэ асуудал дээр цаашид үргэлжлүүлэн ажиллана. Үүнд шаардлагатай бүхий л арга хэмжээ авахыг Ерөнхий сайд Л.Оюун-Эрдэнэ Шадар сайд бөгөөд ЭЗХ-ийн сайд Ч.Хүрэлбаатар, Эрчим хүчний сайд Б.Чойжилсүрэн нарт даалгалаа" гэсэн байв. Өөрөөр хэлбэл ард иргэдээ бодсон эрх баригчид асуудлыг тэр дор нь зохицуулсан баатрын дүрээр хэвлэл мэдээллээр гарсан юм.

Гэтэл үнэндээ тэд асуудлыг зохицуулсан удирдагчид биш харин албан бичгийг ухаж ойлгоогүй сүржин мэдэгдэл хийж, иргэдийг сандаргаж гүйлгэсэн болж таарч байх шиг байна.

Олон нийтийн сүлжээгээр Оросын талаас ирсэн албан бичгийн хуулбар тархжээ. Энэ бичигт 13-ны өдрөөс эхлэн тодорхойгүй хугацаагаар цахилгаан хязгаарлах биш харин чухамхүү 12 дугаар сарын 13-ны өдөр л эрчим хүчний нийлүүлэлт буурч болзошгүй гэдгийг анхааруулсан байв. 

Диспетчерийн үндэсний төвийн захирал Г.Балжиннямд хаягласан энэ бичгийг 12 дугаар сарын 12-ны өдөр үйлджээ. Албан бичигт "засвар үйлчилгээ, хэт хүйтэн цаг агаарын улмаас эрчим хүчний хэрэглээ нэмэгдсэнээс үүдсэн" гэж шалтгааныг бичээд "Москвагийн цагаар 12 дугаар сарын 13-ны өдрийн 04:00-15:00 цаг хүртэл эрчим хүчний нийлүүлэлтийг 150МВт-ээс илүүгүй нийлүүлэхээр болсон" гэжээ. Энэ нь Улаанбаатарын цагаар 12 дугаар сарын 13-ны өдрийн 09:00-20:00 цагийн хооронд бөгөөд "Орос цахилгаанаа хязгаарлах нь " гэж манайхан 13-ныхаа үд дунд шуугиж, цахилгааны хязгаарлалт дуусах 20:00 цаг орчимд "бид зохицуулчихлаа" хэмээн мэдэгдэл хийжээ. 

Технологи хөгжиж, Google -ийг цэцэрлэгийн хүүхэд ч ашиглаж чаддаг болсон энэ үед хэдэн түшээд Google Translate  ч болтугай ашиглаад ганц бичиг орчуулчихаж дөнгөсөнгүй юу, эсвэл иргэдийг сандаргаж, үүссэн асуудлыг хурдан шийдсэн дүр эсгэж улс төрийн оноо авахыг хүсэв үү? Ямартай ч эрчим хүч эмзэг хэвээр.

Г.Бямбасүрэн