"Дахиад амь алга, одоо зогс" хэлэлцүүлэг үргэлжилж байна. Тус хэлэлцүүлгийн үеэр ижил асуудалтай буюу цэрэгт явсан хүүгээ алдсан эцэг эхчүүд хот, хөдөөгөөс зорин иржээ. Нөгөө талд, Батлан хамгаалах яам, Зэвсэгт хүчний жанжин штаб зэрэг төр төлөөлсөн байгууллагаас албаны хүмүүс хариу тайлбар өгч байна. 

Эцэг эхчүүдийн төлөөлөл: Цэргийн алба нь бүх нийтээрээ заавал хаахаар хуульчлагдаагүй буюу зарим тохиолдолд чөлөөлөгдөж болдог. Гэвч цэргийн жинхэнэ албанд тухайн жилд татах иргэний тоо, татлага явуулах ээлж, хугацааг Засгийн газар батална гэж Цэргийн албаны тухай хуульд заасан. Үүндээ нийцүүлэхээр оюутныг ч татсан нь ийм байдалд хүргэсэн гэх шүүмжлэл байна. Эх оронч сэтгэлгээг хөгжүүлнэ гэдэг ч яг яаж гэдэг нь тодорхойгүй, зорилгодоо хүрдэг эсэх нь ч мэдэгдэхгүй. Ялангуяа дарлал, дэглэлтийг тэсэж үлдэх үү, үгүй юу гэдгээ шалгах бүтэн жилийн хугацаанд залууст эх орноо хайрлах сэтгэл гүн суух нь юу л бол. Улсын хилийн бүрэн бүтэн байдал, тусгаар тогтнолоо хамгаалах сэтгэлгээг ерөнхий боловсролын сургуульд буюу багаас нь төлөвшүүлэх учиртай болохоос нас биед хүрсэн хүмүүст гэнэт суучих зүйл мөн эсэх нь бодох л асуудал" хэмээн үзэл бодлоо илэрхийлж байлаа. 

Батлан хамгаалахын Ерөнхий хянан шалгагч бригадын генерал Ж.Болдбаатар:  Цэрэгт дүрмийн бус харилцаа үүсдэг нь үнэн. Үүнийг болиулах, хандлагын алдааг засахаар идэвхийлэн ажиллаж байгаа. Бид жилээс жилд хэвлэл мэдээллийн салбартай хамтран ажиллаж цэргийн ангитай танилцуулдаг. Одоогийн мөрдөгдөж байгаа хуулийн оюутнуудыг цэрэгт татна. Харин бид цэрэгт татах зохицуулалтыг хийх ёстой. Цэрэг татлагатай холбоотой дүрэм, журмыг өөрчилнө. Батлан хамгаалахын сайдын тушаал гарсан" гэв.