Румыний депутатуудын танхимын гишүүн Андре Лупу парламентад нэр дэвшиж буй хүмүүсийн сэтгэцийн эрүүл мэндийг албан журмаар шалгадаг болох хуулийн төсөл санаачилжээ. Ийм хуулийн төсөл санаачлах болсон нь тус улсын сенатч Диана Шошоакэгийн тарьсан дуулиантай холбоотой гэж Digi24 мэдээлсэн байна. 

Тодруулбал, зургадугаар сарын 26-ны даваа гарагт, Румыний парламентын хоёр танхим хамтарсан хуралдаан хийх үеэр сенатч Шошоакэ индэр дээр гарч ирэн, хүмүүсийн яриаг шүгэлдэж тасалдуулаад, хурал даргалагчийн микрофоныг унтраагаад, даргалагч Альфер Симонисыг "цирк рүү яв" хэмээн хэлсэн аж.

Үүгээр түүний адал явдал дууссангүй. Шошоакэ Беларусийн Ерөнхийлөгч Александр Лукашенкотай ярьж, Вагнерын цэргийн бослогын дараа Орост хурцадмал байдлыг намжаах талаар тохиролцсон, ингэснээрээ "АНУ-ыг аварсан" хэмээн мэдэгдсэн байна. Дараа нь Румыний Ерөнхий сайд Марчел Чолакутай маргалдаж, улс орноо "Америкт зарсан" хэмээн буруутгасан бол Ерөнхий сайд хариуд нь түүнийг "Оросын элчин сайдын яам руу яв" хэмээжээ. 

Түүний энэ үйлдэл ихээхэн шуугиан тарьж, олон нийтийн сүлжээний хэрэглэгчид сенатчийн сэтгэцийн эрүүл мэнд хэвийн эсэхэд эргэлзсэн байна.

"Тиймээс л бид сэтгэцийн эрүүл мэндийн талаар эмнэлгийн магадлагаа авсан хүмүүс л парламентад сонгогдох эрхтэй болох хуулийг санаачилсан юм" гэж  парламентад нэр дэвшиж буй хүмүүсийн сэтгэцийн эрүүл мэндийг албан журмаар шалгадаг болох хуулийн төсөл санаачилсан Андре Лупу мэдэгдсэн байна.

"Сэтгэцийн ноцтой хямрал нь эргэцүүлэн бодох, үндэслэлтэй шийдвэр гаргах чадварт нөлөөлж болзошгүй байдаг, харин нэр дэвшигчдийн сэтгэцийн эрүүл мэндэд дүн шинжилгээ хийснээр парламентын албан тушаалд очсоныхоо дараа зохисгүй, буруу шийдвэр гаргаж болзошгүй хүмүүсээс зайлсхийх боломжтой болно" гэж хуулийн төслийн тайлбарт бичсэн байна.

Г.Бямбасүрэн