Хятадын оршин суугч 55 настай Лян Ши Сычуанийн их сургуульд элсэх мөрөөдөлтэй гэнэ. Ингээд тэрбээр 27 дахь удаагаа шалгалт өгсөн ч бүтэлгүйтсэн талаар SCMP сонин мэдээлжээ. 

Хятадад гаокао гэж нэрлэгддэг, манай улсын ЭЕШ-тай ижил шалгалтыг анх Лян Ши 40 жилийн өмнө өгөөд бүтэлгүйтсэн байна. Лян боловсрол эзэмшээгүй ч хар ажлаас эхэлж хөдөлмөрлөсөөр саятан болж чадсан нэгэн аж. Тэрбээр анх үйлдвэр дээр туслах ажилчин хийж байгаад одоо өөрийн гэсэн компанитай болсон бөгөөд түүний компани барилгын материал үйлдвэрлэдэг юм байна.Лян олон сая юань олсон ч эртнээс л их дээд сургуульд элсэн орж, сэхээтэн болох хүсэлтэй гэнэ. Ингээд жил бүр шалгалт өгсөн ч шалгалтаа давж чадахгүй байгаа талаар Хятадын хэвлэлүүд мэдээлжээ. 

Лян анх байгалийн шинжлэх ухааны факультетад элсэн орох хүсэлтэй байсан аж. Гэвч түүний оролдлого удаа дараа бүтэлгүйтсэн тул урлаг, хүмүүнлэгийн ухааны факультетад хүч үзэхээр шийджээ. Энэ нь арай хялбар байна гэж тэр бодсон ч мөн л бүтэлгүйтсэн байна. 2021 онд Лян гаокао шалгалт өгч, 521 онооноос 403 оноо авсан бол энэ удаад 424 оноо авчээ. 

Энэ удаад дахин бүтэлгүйтсэн тул ирэх жил дахин шалгалт өгөх эсэхдээ эргэлзэж эхэлсэн гэнэ. Гэхдээ гаокаод бэлдэхгүй өнгөрүүлсэн өдрүүд утгагүй санагдана, тиймээс дахин шалгалт өгч магадгүй хэмээн ярьжээ.

Г.Бямбасүрэн