Хятадын инфлүнсүрүүдийг эх оронч медиаконтент түгээхийг шаарддаг болох гэнэ. Холбогдох баримт бичгийг хууль тогтоогчид хэлэлцэж байгаа гэж SCMP сонин мэдээлсэн байна. 

Эх сурвалжийн мэдээлснээр,  БНХАУ-д эх оронч медиаконтент хөгжүүлэх тухай хуулийн төслийг Бүх Хятадын Ардын төлөөлөгчдийн хурлын Байнгын хороонд өргөн барьсан гэнэ. Энэ хуулийн төслийг бүрэн эхээр нь олонд танилцуулаагүй ч энэ нь интернет инфлүнсэрүүдтэй холбоотой гэж Хятадын хэвлэлүүд мэдээлжээ. 

Хууль батлагдсан тохиолдолд инфлүнсэрүүд шинэ интернет платформ, технологийг ашиглан эх оронч контент түгээх үүрэгтэй болох гэнэ. Түүнчлэн энэ эх оронч контент нь голчлон сурагчид болон хилийн чанадад суугаа уугуул хятадуудад зориулагдсан байх аж. 

Хятадын төрийн хэвлэлүүд энэ хуулийн талаар мэдээлэхдээ, "үндэсний ухамсар, ард түмний эв нэгдлийг дээшлүүлэх" зорилготой гэж онцолжээ. Гэхдээ энэ хуулийн төслийг байнгын хороо хэзээ хэлэлцэх нь тодорхойгүй байна.

Г.Бямбасүрэн