"Дарханы төмөрлөгийн үйлдвэр" ХХК, "Цемент шохой" ХК, "Эрдэнэт үйлдвэр" ТӨҮГ-т учирсан хор хохирлын эзэн холбогдогч Д.Эрдэнэбилэг хилээр гарсантай холбоотойгоор Засгийн газрын итгэмжлэгдсэн төлөөлөгчид АТГ-т хандаж байгаа талаараа мэдээлэл хийлээ. 

Энэ талаар "Эрдэнэтийн 49 хувь,  Дарханы төмөрлөгийн үйлдвэр ХХК, Цемент шохой ХК хувьчлалтай холбоотой Эрүүгийн хэргийн гол хэрэгт холбогдож байгаа яллагдагч Должингийн Эрдэнэбилэг МУ-ын хилээр гарч яваад эргэж ирээгүй, орон зайлсан нөхцөл байдал үүсэн байна. 

Эрдэнэтийн 49 хувьтай холбоотой маргааныг 2019 оноос,  Дарханы төмөрлөгийн үйлдвэр ХХК, Хөтөлийн цемент шохой ХК-тай холбоотой хэргийг 2020 оны эхнээс эхлүүлээд АТГ шалгаж байгаа. Энэ хүрээнд үйл баримтын хүрээнд хэд хэдэн он сар дурьдаж өгье. 

Нэгдүгээрт, 2022.12.28 өдөр хэргүүдийг прокурорт шилжүүлсэн. Гэтэл 2023.02.09-ний өдөр Д.Эрдэнэбилэгийн өмгөөлөх шүүхэд "Удаан хугацаагаар эмчлүүлэх шаардлагатай. 14 хоногийн хугацаагаар Сингапур улсад эмчилгээ хийх шаардлага байгаа учраас хилийн хоригийг цуцалж өгөөч" гэсэн хүсэлт тавьсан байдаг. Харамсалтай нь энэ хүсэлт Засгийн газрын итгэлжлэгдсэн төлөөлөгчид болох бидэнд мэдэгдэлгүйгээр Сүхбаатар дүүргийн Эрүүгийн хэргийн шүүхээс гурван тэрбум төгрөгийн барьцаатайгаар явуулсан байдаг. Өнөөдрийг хүртэл улсын хилээр орж ирээгүй. 

Хоёрдугаарт, 2023 оны дөрөвдүгээр сард прокуророос хэргийг буцаагаад АТГ-т ирүүлсэн. Үндэслэл нь хэргийн гол яллагдагч Д.Эрдэнэбилэг Монголд байхгүй учраас хэргийг буцааж байна гэсэн. Шүүх, прокурор өөрсдөө гаргаж явуулаад хүн нь байхгүй гэдэг шалтгаанаар мөрдөн байцаалтад буцаасан. Энэ хэрэг хэзээ эргэж сэргэж, хэзээ шүүхээр шийдэгдэх вэ гэх нөхцөл байдал ойлгомжгүй байна.

Монгол Улстай ялтан шилжүүлэх гэрээгүй Сингапур улс руу "Дарханы төмөрлөгийн үйлдвэр" ХХК 2.8 их наяд, "Цемент шохой" ХК 300 тэрбумын, "Эрдэнэт үйлдвэр" ТӨҮГ-т 4 их наяд төгрөгийн хохиролтой нийт 7 их наядын хохиролтой хэрэг дээр ГУРАВХАН тэрбум төгрөгийн барьцаа тавиад явчихсан. Үүнийг шүүхийн үйл ажиллагаа хуулийн дагуу хийгдээгүй гэж эргэлзэж хардаж байгаа учраас гурван төрлийн хүсэлт гаргаж байна. 

Нэгдүгээрт, энэ шийдвэрийг гаргасан Сүхбаатар дүүргийн Эрүүгийн хэргийн шүүгчийг шалгах өгөх. Хэвийн үйл ажиллагаа явуулж байгаа шүүх дээр ийм шийдвэр гаргах боломжгүй байдаг. Жирийн хүнд маш хурдан баривчлаад, өвчтэй байхад хүртэл гадаад явуулдаггүй. Гэтэл улс орон даяар мэдэж байгаа ТӨК-тай холбоотой хэрэг дээрх ийм шийдвэр гарсан нь ашиг сонирхлын зөрчил үүссэн байна гэж хардаж байгаа учраас уг асуудлыг шалгаж өгөөч гэсэн хүсэлтийг АТГ-т газарт гаргаж байна. 

Хоёрдугаарт, Энэ хэрэг ганц Д.Эрдэнэбилэгтэй холбоотой биш 21 иргэн 2 хуулийн этгээдтэй холбоотой хэрэг. Бусад 21 хүнийг бас хил гаргаад явуулчихсан юм биш биз дээ. Яагаад гэвэл Засгийн газрын итгэмжлэгдсэн төлөөлөгчдөд ямар ч мэдээлэл өгөөгүй. Үлдсэн Болор, Эрдэнэбат, Пүрэвтүвшин, Орхон, Шижир, Сугар, Батбаяр, Энхболд нарын хүмүүс хилээр гараад явсан эсэх мэдээллийг дэлгэрэнгүй өгөөч гэх хоёр дахь хүсэлтийг гаргаж байна. 

Гуравдугаарт, "Дарханы төмөрлөгийн үйлдвэр" ХХК, "Цемент шохой" ХК, "Эрдэнэт үйлдвэр" ТӨҮГ-ын хохирол тасралтгүй өсөж байна. Төрд авснаас хойш нуун дарагдуулсан баримтууд гарч ирж байна" гэлээ.