Атлантын тэнгисийн ёроолд байх Титаник онгоцыг үзэх аялалд Британийнх тэрбумтан, Палестины тэрбумтан хүүгийн хамт тус бүр 250 мянган доллар төлж, улмаар шумбагчийг хариуцдаг OceanGate компанийн захирал, жолооч нийлсэн нийт таван хүн шумбагч аппаратад суун далайн гүн рүү шумбаад удалгүй сураг тасарч байлаа. Эрэн хайх ажил эхлүүлж, хэд хоногийн дараа шумбагч аппарат сүйрсэн гэсэн мэдээлэл гарч байлаа.

Энэ шумбагч аппаратын сүйрлээр 19 настай Сулейман Давуд эцэг Шахзад Давудын хамт амиа алдсан юм. Хүүгийн оронд түүний ээж энэ аялалд явах байсан ч далайн гүн рүү чиглэх аяллыг хүү нь маш их хүссэн тул өөрийнхөө оронд хүүгээ явуулсан гэж Кристин Давуд ВВС агентлагт өгсөн ярилцлагадаа ярьжээ.

Кристин Давудын өгүүлснээр, тэрбээр нөхөр, тэрбумтан Шахзада Давудтай хамт шумбагч аппаратаар аялалд гарахаар эртнээс төлөвлөж байсан гэнэ. Анхлаад коронавирусийн цар тахлын улмаас аяллаа хойшлуулж байсан бол дараа нь хүүгийнхээ хүслийг биелүүлэхийн тулд өөрийнхөө оронд хүүгээ явуулжээ. 

Хүү  Сулейман Давуд нь далайн ёроолд Рубик шоо эвлүүлэх дээд амжилт тогтоохыг хүсэж байсан гэнэ.

"Би Титаникийн хажууд, 3,7 мянган метрийн гүнд Рубикийн шоо эвлүүлнэ гэж хүү минь хэлж байсан юм" хэмээн Кристин дурсжээ. Сулейман Глазго дахь Стратклайдын их сургуульд суралцаж байсан аж. Тэрээр Рубикийн шоог 12 секундын хугацаанд эвлүүлдэг байсан, шумбагч аппаратын аялалд гарахаасаа өмнө Гиннессийн дээд амжилтын номонд шоо эвлүүлсэн амжилтаа бүртгүүлэх урьдчилсан хүсэлт гаргасан байжээ.

Титаны сүйрэл 

Жуулчдыг суулгасан шумбагч аппарат тэнгисийн ёроолд байх Титаник хөлөг онгоцыг үзэхээр далайн гүн рүү шумбасан ч холбоо тасарсан гэж хэвлэлүүд мэдээлж байсан юм. Энэ шумбагч аппаратад таван хүн байсан аж. Тэдний дунд агаарын техникийн худалдааны компани эзэмшдэг Британийн тэрбумтан Хэмших Хардинг байсан гэнэ.

Шумбагч аппаратыг эрэн хайх ажлыг АНУ, Канадын цэргийн алба хаагчид явуулж, тэдэнд далайчид ч туслаж байв. Харамсалтай нь зургадугаар сарын 22-нд Титан шумбагч аппарат сүйрсэн байхыг далайн ёроолоос олсон юм. 

АНУ-ын Эргийн хамгаалалтын мэдээлснээр Титаник хөлөг онгоцыг үзэхээр далайн ёроол руу шумбасан Титан шумбагч аппаратын сүүлний хэсэг, мөн 3800 метрийн гүнд байх Титаник онгоцны хамар хэсгээс 500 метрийн зайд шумбагч аппаратын бусад хэлтэрхийнүүдийг олжээ. Хэлтэрхийнүүдээс харахад дэлбэрч сүйрсэн байж болзошгүй хэмээн таамаглаж байгаа бөгөөд гэхдээ сүйрлийн шалтгааныг эцэслэн тогтоогоогүй байгаа гэнэ.

Хөлгийн багийн бүрэлдэхүүн 

Шумбагч аппаратад жолоодогч, гурван жуулчин, хөтөч гээд таван хүн байжээ. Тодруулбал, 59 настай Британийн бизнесмен, аялагч Хэмиш Хардинг, Пакистаны бизнесмен Шахшада Давуд болон түүний хүү Сулеман гэсэн гурван жуулчин, мөн шумбагч аппаратыг эзэмшдэг OceanGate компанийн ерөнхий захирал Стотктон Раш, аппаратыг жолоодогч, Францын цэргийн шумбагч асан, Титаникийг судлаач Поль-Анри Наржоле нар байжээ.

Далайн ёроол руу хийсэн аяллын бүрэлдэхүүнд багтсан Хэмиш Хардинг бол хувийн онгоцны худалдаа, үйлчилгээ эрхэлдэг, Дубайд төвтэй Actio Aviation компанийн тэргүүн юм. Харин Пакистаны бизнесмен Давуд Пакистаны чинээлэг эгр бүлээс гаралтай, тэрбээр хүүгийнхээ хамт далайн ёроол руу хийсэн аялалд гарчээ. 

Титаник онгоцны үлдэгдлийг харах далайн гүний энэ аялалд гарахын тулд тэд тус бүр 250 мянган доллар буюу монгол мөнгөөр тооцвол 874 сая төгрөг төлсөн байна. Шумбагч аппарат далайн ёроол руу шумбаж, Атлантын далайн ёроолд 3800 метрийн гүнд байгаа Титаникийг харж, эргээд усны гадаргуу руу гарч ирэхэд нийтдээ найман цагийг зарцуулдаг байна. 

Эргэн сануулахад, таван хүн суулгасан Титан шумбагч аппарат зургадугаар сарын 18-ны өдөр Атлантын далайд сураггүй болсон юм. Энэ аппаратыг хэд хоногх хайсны эцэст Титаник хөлөг онгоцны ойролцоо шумбагчийн хэлтэрхийг олж байв. Шумбагч аппарат гүний хэт их даралтыг тэсвэрлэлгүй дэлбэрч, таван хүн амиа алдсан байна.

Г.Бямбасүрэн