ОХУ есдүгээр сарын гуравны өдрийг "милитарист Японыг ялсан өдөр" хэмээн нэрлэн тэмдэглэх болсонтой холбоотойгоор Япон улс ОХУ-д эсэргүүцэл илэрхийлжээ. Энэ нь ОХУ-д Японы эсрэг, Японд Оросын эсрэг хандлагыг нэмэгдүүлнэ гэж Японы тал үзэж байгаа хэмээн Ройтерс мэдээлсэн байна. 

"Энэхүү хуулийг батласнаар Оросын ард түмнхий дунд Японы эсрэг хандлагыг нэмэгдүүлээд зогсохгүй япончуудын дунд ч Оросын эсрэг хандлагыг дэвэргэнэ" хэмээн Японы Сайд нарын танхимын Ерөнхий нарийн бичгийн дарга  Хироказу Мацуно мэдэгдээд Оросын энэ үйлдэл нь "нэн эмгэнэлтэй" хэмээн онцолсон байна.

Оросын Ерөнхийлөгч Владимир Путин "Милитарист Японыг ялсан баярын өдрийг тэмдэглэх тухай хууль"-д зургадугаар сарын 24-ний өдөр гарын үсэг зуржээ.

Өмнө нь Орост есдүгээр сарын гуравны өдрийг "Дэлхийн II дайн дууссан өдөр" хэмээн тэмдэглэдэг байсан бол шинэ хууль хүчин төгөлдөр болсноор "Милитарист Японыг ялсан, Дэлхийн II дайн дууссан өдөр" болгон тэмдэглэхээр болсон байна.

Энд дуулгахад, ОХУ  өнгөрсөн онд Украинд дайн өдүүлсний дараа Японы эрх баригчид Оросын эсрэг хоригт нэгдсэн юм. Үүний дараа, 2022 оны гуравдугаар сард ОХУ Курилийн арлуудын статус, энхийн гэрээ байгуулах хэлэлцээрийг цааш үргэлжлүүлэхээс татгалзсан. Түүнчлэн Курилийн арлууд дээр япончуудыг визгүй нэвтрүүлэх журмыг цуцалж байлаа.

Г.Бямбасүрэн