Оросын Ерөнхийлөгч Владимир Путин ашигладаг, "Россия" тусгай нислэгийн отрядын нисэхийн паркийн хоёр онгоц зургадугаар сарын 25-нд шилжих шөнө Москва хот руу буцжээ. Энэ талаар FlightRadar сайтын мэдээллээс харж болохоор байна гэж "Агентство" мэдээлсэн байна. Пригожин бослого гаргадаг өдөр Путин онгоц хөлөглөн зугтсан гэх мэдээлэл гарч, харин Оросын эрх баригчид үүнийг үгүйсгэж байлаа. 

Эх сурвалжийн мэдээлснээр, зургадугаар сарын 24-ний 14:16 цагт Внуково нисэх буудлаас Санкт-Петербург чиглэн Путинийн Ил-96-300ПУ онгоц хөөрчээ. Энэ онгоц Тверь орчимд радараас алга болсон бөгөөд энд Путиний нэг ордон байдаг аж. Үүнээс хагас цагийн дараа, Ерөнхийлөгчийн өөр нэг онгоц болох Ту-214ПУ Москвагаас мөн л Петербург чиглэн хөөрч, Гатчина орчмоос радараас алга болсон байна.

Flightradar24 сайт дээрх мэдээллээс харахад, эхний онгоц болох Ил-96-300 ПУ зургадугаар сарын 25-нд шилжих шөнө Тверь муж дээгүүр нисэх үедээ илрүүлгийн системээ асаажээ. Ингээд Москва хүртэл нисээд, Москвагийн дагуу хот болох Чехов дээгүүр 15 минут орчим эргэлдэн нисэж байгаад 03:43 цагт газардсан аж. Харин хоёр дахь онгоц Тверь мужийн бүсэд 01:13 цагт радарт бүртгэгдсэн бөгөөд 01:50 цагт Москвад газардсан байна. Энэ хоёр онгоц хаанаас нисэж ирсэн нь тодорхойгүй байгаа гэнэ. 

Энд дуулгахад, тусгай нислэгийн отряд "Россия"-ийн нисэх парк нь Ерөнхийлөгч болон бусад өндөр албан тушаалтнуудыг тээвэрлэх онагоцуудыг хариуцдаг аж. Владимир Путин RA-96022 дугаартай онгоцыг ашигладаг гэнэ.

Г.Бямбасүрэн