Британийн эртний амралтын газруудын нэг болох Уайт арал жуулчдыг татахын тулд сонирхолтой аян зарлажээ. Энэ талаар The Mirror мэдээлсэн байна. Эх сурвалжийн мэдээлснээр, жуулчдыг арал руу хүргэдэг, усан онгоцны аялал зохион байгуулдаг  Red Funnel компани ийм санал тавьжээ.

Жуулчид нарлаг өдрөөр аялна гэсэн баталгааг компаниас авах бөгөөд аяллын үеэр бороо орж, аялал тасалдвал мөнгөө буцааж авах боломжтой гэнэ. Гэхдээ ийнхүү мөнгөө буцаахын тулд хэд хэдэн нөхцөлийг биелүүлсэн байх шаардлагатай. Жуулчид Уайт арал дээр зургаа, долоо эсвэл наймдугаар саруудад доод тал нь тав хонох ёстой бөгөөд тэднийг ийнхүү аялах үеэр наймаас дээш цаг бороо орж, аялал тасалдсан нөхцөлд мөнгийг эргүүлэн олгох аж.

Уайт арал нь Их Британийн түүхэн амралтын газруудын нэг юм. Хатан хаан Викториягийн үеэс л энэ арал руу жуулчдыг татах ажил эхэлсэн бөгөөд энд Британийн эртний цэнгэлдэх хүрээлэн, уурын зүтгүүртэй төмөр зам байдаг аж. 

Г.Бямбасүрэн