Гэрийн тэжээвэр амьтад эзнээ аварсан тохиолдлууд бишгүй. Тэд эзнээ галаас, өвчтэй байхад нь зайлшгүй үхлээс аврах гээд төрөл бүрээр тусалдаг. Үүний зэрэгцээ зэрлэг амьтад ч хүнийг үхлээс аварсан гайхалтай түүхүүд бий. Ийм олон түүхээс цөөн хэдийг амралтын өдөрт тань зориулан сонирхуулж байна. 

Горилла гурван настай хүүг аварсан нь 

 
Амьтны хүрээлэнгүүдэд зэрлэг амьтдыг тусгайлан хашсан бүсэд байрлуулдаг гэдгийг хүн бүр мэднэ. Энэ нутаг дэвсгэрийг амьтад өөрийнх гэж үзэх бөгөөд "хил зөрчвөл" ихэд уурсдаг. 

1996 оны наймдугаар сарын 18-ны өдөр АНУ-ын Иллинойс мужийн Брукфилд хотод байх амьтны хүрээлэнд явж байсан гурван настай хүү торруу авирч, сармагчингуудын нутагт унажээ. Хайсны өндөр таван метр орчим байсан тул хүү унахдаа толгойгоо хүчтэй цохин ухаан алдсан байна. 

Тусламж ирэхийг хүлээлгүй Бинти-Жуа гэх гориил хүүг аврахаар ухасхийжээ. Горилла хүүг болгоомжтойгоор тэврэн авч, хайсны хаалга руу очин, аврагчдад өгсөн аж. Горилла ингэж туслаагүй байсан бол хүүгийн амь насыг аврах эсэх нь ихээхэн эргэлзээтэй байсан гэж аврагчид болон эмч нар өгүүлж байжээ. 

Дээрэмчдээс охиныг аварсан арслангууд 

Энэ явдал Эфиопт 2005 онд болжээ. Бита Женет гэх хотод амьдардаг гэр бүлийн хамгийн бага охин болох 12 настай охиныг 2005 оны зургадугаар сарын эхээр үл мэдэгдэх этгээдүүд хулгайлсан байна. Дээрэмчид охиныг байнга зодож, хүчээр гэрлүүлэх гэж байсан гэнэ. Долоо хоногийн туршид зодуулж, цааш хувь заяа нь хэрхэх нь тодорхойгүй байсан охиныг араатан амьтан хүн гээч араатнаас аварсан гэдэг. 

Хэрэг болсон өдөр, охиныг хулгайлсан хүмүүс түүнийг хүчирхийлэхээр цөл газарт аваачжээ. Гэтэл гэнэт бутан дундаас гурван арслан гарч ирэн, зандалчин эрчүүд рүү гүйсэн гэнэ. Эрчүүд айж сандран зугтааж, охиныг арслангийн өгөөш болгон хаясан аж. Гэвч арслангууд охинд хор хүргээгүйн зэрэгцээ, охины ойролцоо хэвтэж, охиныг хайж байсан цагдаагийнхан ирэх хүртэл хамгаалсан гэнэ. Цагдаагийн машин үзэгдмэгц арслангууд өөр тийш гүйн оджээ.

Охиныг аварсан арслангуудыг нутгийн иргэд "бурхнаас илгээгдсэн аврагчид" хэмээн ярьцгааж байв. Эфиопиийн Хөдөө аж ахуйн хөгжлийн яамны онгон байгаль судлаач Стюарт Уильямсын үзсэнээр охин чангаар уйлж байсан нь түүнийг аварсан байх магадлалтай гэнэ. Охины уйлах дууг арслангууд аврал эрсэн гүенгийн дуу гэж бодон, охиныг хамгаалсан байх магадлалтай аж.

Живж буй шумбагчийг цагаан халим аварсан нь

Энэ үйл явдал Хятадын Харбин хотын Polarland аквариумд болжээ. Тухайн үед шумбагчдын тэмцээн болж байсан бөгөөд оролцогчид халим сэлж байсан хүйтэн устай усан сангийн ёроол руу, ойролцоогоор зургаан метрийн гүн рүү шумбах ёстой байжээ. Ингэхдээ хүчилтөрөгчийн аппаратгүй орох ёстой байв. 

Тэмцээний оролцогчдын нэг 26 настай  Янг Юн ёроолд хүрмэгч хөл нь мэдээ алдаж, бүсгүй ихэд айн, амьсгалж эхэлсэн байна. Шумбагч бүсгүй ийм нөхцөлд амиа алдах нь гарцаагүй байв. Харин энэ үеэр азаар хажуугаар нь Мила дуудлагат цагаан халим сэлж явжээ. Халим Янг Юны хөлнөөс нь дэмжин, усны гадаргуу руу түлхсэн байна. Ингээд бүсгүй амьд мэнд үлджээ.