Хойд Солонгос пуужин болон цөмийн хөтөлбөр хэрэгжүүлснийхээ төлөө НҮБ-ын хоригт ороод олон жилийн нүүрийг үзэж байна. Гэсэн ч энэ улстай ойр харилцаатай БНХАУ Хойд Солонгос руу хоригт орсон бараа бүтээгдэхүүнийг нийлүүлдэг гэх мэдээлэл олонтаа гардаг юм.
Энэ оны тавдугаар сард гэхэд л Хятад БНАСАУ руу НҮБ-ын тогтоолоор хориглосон 58 нэр төрлийн бараа нийлүүлсэн байна. Энэ талаар БНХАУ-ын Гаалийн ерөнхий газрын тайлангаас иш татан "Америкийн дуу хоолой" радио мэдээлжээ. Эх сурвалжийн мэдээлснээр, төвөөс зугтах насос, нарны зайгаар ус халаагч, түгжигч клапан зэрэг бүтээгдэхүүн зэрэг нийт 58 нэр төрлийн, 100 тонн орчим жинтэй, 225 мянган доллараар үнэлэгдэх ачааг БНХАУ Хойд Солонгос руу нийлүүлжээ.
Өмнө нь Хятад улс Хойд Солонгос руу хөргөх төхөөрөмж нийлүүлж байв. НҮБ-ын Аюулгүйн зөвлөлийн тогтоолоор хориглогдсон бараа бүтээгдэхүүнийг БНХАУ Хойд Солонгос руу гурван жилийн туршид нийлүүлж байгаа бөгөөд сүүлийн саруудад улам нэмэгдсэн гэж эх сурвалж онцолжээ.
Г.Бямбасүрэн
| Уншиж байна |