Атлантын тэнгисийн ёроолд байх Титаник онгоцыг үзэхээр жуулчдыг суулган, далай руу орсон шумбагч аппарат холбоо тасарч, улмаар эрэн хайх ажлыг АНУ, Канадын цэргийнхэн эхлүүлж, зургадугаар сарын 22-ны өдөр шумбагчийн хэлтэрхийнүүдийг олсон юм. Энэхүү үйл явдал нь ХХ зуунд сүйрсэн Титаникийн сүйрэлтэй зарим талаар адилхан байна гэж 1997 онд Титаник киног бүтээсэн найруулагч Жеймс Кэмерон өгүүлжээ. 

"Хөалөг онгоцны өмнө мөсөн уул байгааг ахмадад удаа дараа сануулж байсан, улмаар саргүй шөнө мөсөн уул мөргөж, олон хүн амиа алдсан Титаникийн сүйрэлтэй энэ осол ихээхэн төстэй байгаа нь намайг ихэд гайхшруулсан" хэмээн Кэмерон өгүүлжээ. Түүний өгүүлснээр, энэ хоёр осол хоёулаа нэг л газар болсон, мөн аль аль тохиолдолд сэрэмжлүүлгийг анхаараагүй гэдгээрээ ихээхэн адилхан байгаа гэнэ. 

Тэрбээр эрлийн ажлын үеэр ч Титан шумбагч аппарат сураггүй болсонтой холбоотойгоор байр сууриа илэрхийлж байв. Шумбагч аппаратын экипажийн бүрэлдэхүүнийг амиа алдсан гэж хүлээн зөвшөөрөхөөс ч өмнө тэрбээр энэ шумбагчид байсан бүх хүн амиа алдсан гэдэгт итгэлтэй байгаагаа илэрхийлж байсан юм. 

Г.Бямбасүрэн