Өнгөрсөн баасан гарагт Уганда улсын, Конготой хиллэх Мпондв хотод байрлах дунд сургуулийн дотуур байр руу алан хядах бүлэглэлийнхэн халджээ. Энэ халдлагын улмаас олон сурагч амиа алдаж, зургаан хүүхэд барьцаалагдсан талаар Евроньюс агентлаг мэдээлсэн байна. 

Эх сурвалжийн мэдээлснээр, тус улсын түүхэн дэх хамгийн цуст халдлагуудын нэг болсон сургуулийн байранд үйлдэгдсэн халдлагын улмаас 42 хүн амиа алдаж, зургаан хүн барьцаалагджээ. Сурагчдыг буудаж, мөчилж, шатаах зэргээр харгисаар хөнөөсөн талаар Угандагийн хэвлэлүүд мэдээлжээ.

Энэ халдлагыг "Исламын улс" алан хядах бүлэглэлд үнэнч байхаа тангаргалсан "Холбоотны ардчилсан хүч" бүлэглэл үйлдсэн байх магадлалтай аж. Тус бүлэглэл хөрш Конго улсын нутаг дэвсгэр дээр байрлаж, Угандагийн Ерөнхийлөгчийг түлхэн унагахын төлөө тэмцдэг гэнэ.

Г.Бямбасүрэн