Амазон, Хилтон, Марриотт зэрэг 40 гаруй том компани Европ дахь Украины олон мянган дүрвэгчид ажил олоход нь тусална гэж даваа гарагт мэдэгдлээ. 

Tent Partnership for Refugees буяны байгууллагын мэдээлснээр, даваа гарагт Парис хотноо 41 компани Европт байгаа дөрвөн сая дүрвэгч, тэр дундаа Украины дүрвэгч эмэгтэйчүүдэд ажил олох, шинэ мэргэжил эзэмшихэд нь тусална хэмээн амласан байна.

Hilton болон Marriott International зэрэг зочид буудлын сүлжээ болон өөр хэд хэдэн компани 13680 дүрвэгчийг ажилд авахаар амласан бол Adecco, ManpowerGroup болон Randstad зэрэг хөдөлмөр зуучин томоохон компаниуд 152 мянган дүрвэгчийг ажилд зуучлахаар болсон бол өөр нэг групп 86 мянган дүрвэгчийг шинэ ажил мэргэжилд сургахаар болжээ. Зөвхөн Амакон гэхэд л Европ дахь салбарууддаа 5000 дүрвэгчийг ажилд авахаар болсон байна. 

Европт Амазон компанийн салбаруудад 200 мянган хүн ажилладаг, шинэ ажилтнууд нь захиалга хүлээн авах зэрэг доод түвшинд ажилладаг бол Украины дүрвэгчид мэргэжил, боловсролтой бол тэднийг албан тушаал ахих боломж хүлээж байгаа гэж компанийн удирдлагууд мэдэгджээ.

НҮБ-ын мэдээллээр, Европын орнуудад өдгөө Украины зургаан сая орчим дүрвэгч байгаагийн дийлэнх олонх нь хүүхэдтэй эмэгтэйчүүд байгаа гэнэ. Тэд ажил олоход хүндрэлтэй, мөн хүүхдээ асрах шаардлагатай тул хөдөлмөр эрхэлж, амин зуулгаа залгуулах боломжгүй байдаг гэж төрийн бус байгууллагууд мэдэгджээ.

Г.Бямбасүрэн