Америкийн Төрийн нарийн бичгийн дарга Энтони Блинкен БНХАУ-д хийж буй айлчлалынхаа хүрээнд тус улсын Гадаад хэргийн сайд Цинь Гантай Бээжин хотноо уулзаж, хэлэлцээ хийсэн талаар Синхуа агентлаг дамжууллаа. 

Хэлэлцээрт Блинкений хамтаар АНУ-ын талаас Зүүн Ази, Номхон Далайн орнуудын асуудал эрхэлсэн, төрийн нарийн бичгийн даргын туслах Дэниел Критенбринк болон БНХАУ дахь АНУ-ын элчин сайд Николас Бернс нар байлцжээ. Харин Хятадын талаас Гадаад хэргийн дэд сайд Ма Жаосюй, сайдын туслах Хуа Чуньин нар оролцсон байна. 

Хэлэлцээр зургаан цаг гаруй хугацаанд үргэлжилж, олон сэдвээр хэлэлцсэний дотор Тайванийн хямрал, Украины сөргөлдөөн, АНУ-ын технологийн бүслэлт гэсэн сэдвүүдийг ч хөнджээ. Энэ үеэр Цинь Ган Блинкенээс АНУ "нэг Хятад" зарчмыг мөрдөж, "Тайванийн салан тусгаарлагчдыг дэмжихээс татгалзах"-ыг шаардсан гэж Хятадын хэвлэлүүд мэдээлсэн байна. 

Энтони Блинкений энэхүү айлчлал нь 2018 оноос хойш АНУ-ын төрийн өндөр албан тушаалтан Хятадад айлчилж буй анхны тохиолдол юм. 2018 онд тухайн үеийн Төрийн нарийн бичгийн дарга Майк Помпео Бээжинд айлчилж байв. 

Г.Бямбасүрэн