УИХ-ын чуулганы үдээс хойших хуралдаанаар эрт илрүүлэх үзлэг, оношлогооны явц, үр дүнгийн талаар Ерөнхий сайдын мэдээллийг сонсож байна.

Мэдээлэлтэй холбогдуулан УИХ-ын гишүүн Б.Бейсен: Улсын хэмжээнд 2022 оны жилийн эцсийн байдлаар халдварт өвчний нас баралт 225 тохиолдол бүртгэгдсэн байна. Үүнээс коронавируст халдварт 142, сүрьеэ 66, төрөлхийн тэмбүү 6, ДОХ 1 байна. Бүр суманд шүү.

Би тухайн үед Эрүүл мэндийн сайд С.Энхболд, ХӨСҮТ-ийн дарга, лабораторийн эрхлэгчтэй уулзаж, тухайн сумын иргэн бүрт үзлэг судалгаа хий гэсэн. Гэтэл хийгдээгүй. Энэ талаар ямар бодлого баримтлах вэ?

2022 оны эцсийн байдлаар бэлгийн замаар дамжих халдвартай 10 718 тохиолдол бүртгэгдсэн байна.  Энэ нь өмнөх оноос 1378-аар их байна. Энэ эрт илрүүлэгтэй холбоотой юу эсвэл ийм өвчлөл байна уу?

Улсын хөгжлийг нүүрс биш эх хүүхдийн эрүүл мэнд, хүн амын дундаж наслалтаар хэмждэг. Гэтэл 2021 оны байдлаар 100 мянган хүн ам тутамд эхийн эндэгдэл 94.9 хувь болчихлоо. Тав хүртэлх насны хүүхдийн эндэгдэл 1000 амьд төрөлтөд 13.9 болчихлоо. Энэ талаар ямар бодлого баримталж байна вэ?

Эрүүл мэндийн сайд С.Чинзориг: Коронавирусын цар тахалтай холбоотойгоор эрүүл мэндийн салбарын зарим тусламж, үйлчилгээнд доголдол үүссэн байна. Ялангуяа халдварт өвчнүүдийн илрүүлэгт анхаарал суларсан байна. Сүрьеэн илрүүлэг буурсан асуудал бий. Цаашдаа халдварт өвчнөөс урьдчилсан сэргийлэх, эрт илрүүлэгтэй холбоотой анхаарал хандуулах шаардлага байгаа.

Тоо харахаар нярай, эхийн эндэгдлийн тоо өндөр гараагүй байна лээ. Гэхдээ дорвитой буурахгүй байгаа. Эх, нярайн эндэгдлийг бууруулах чиглэлээр Засгийн газарт асуудал оруулж, чиглэл оруулж, арга хэмжээ авна.

Эрүүл мэндийн яамны газрын дарга Д.Баярболд: халдварт өвчний тохиолдлын тоо 2022 онд өмнөх онуудаас нэмэгдсэн тоо гарч байгаа. Коронавируст цар тахлын нөлөөгөөр, олон удаагийн хөл хориотой холбоотойгоор халдварт өвчин буурсан үзүүлэлттэй байсан. Одоо хэвийн болсноор халдварт өвчний тохиолдолд ковидын өмнөх үе рүү дөхөж ирсэн байгаа.

Сүрьеэ, бэлгийн замын халдварт өвчний хувьд эрт илрүүлэг, үзлэг шинжилгээнээс гадна идэвхтэй илрүүлгийг эрчимжүүлсэн. Үүнтэй холбоотойгоор илрүүлэг нэмэгдсэн. 

УИХ-ын гишүүн Б.Бейсен: Эрүүл мэндийн салбарт 30 гаруй жил ажилласан эмч хүн учраас санаа зовоод ярьж байна. Халдварт болон халдварт бус өвчинтэй тэмцэх, эх нярайн асуудалтай холбоотой үндэсний стратеги хөтөлбөр заавал байх ёстой. Эрүүл мэндийн яам Засгийн газраар батлуулах шаардлагатай. Иннэснээр салбар хоорондын уялдаа холбоо сайжирдаг. Эрүүл мэндийн ажил тасралтгүй явагдах ёстой. 

Б.Хэрлэн