УИХ-ын гишүүн Б.Пүрэвдорж мэдээлэл хийлээ. Тэрбээр "Үнийн өсөлтөөс шалтгаалж ахмадуудын тэтгэвэрт амьдралд хүрэлцэхгүй байна. ОУВС-ийн шахалтаар 2018.01.01-нээс цалингийн таван жилийн дундажаар боддог байсан тэтгэврийг долоон жил болгосноор өнөөдөр ахмадуудын 85 хувь нь тэтгэврийн хамгийн доод хэмжээ буюу 400-500 мянган төгрөг авч байна. Үлдсэн 10 гаруй хувь нь 500 мянгаас дээш тэтгэвэр авч байна. Ийм харгис төр байж болохгүй гэж үзээд УИХ-ын гишүүд долоон жилийг таван жил болгох хуулийн төсөл өргөн барьсан. Харамсалтай нь, энэ хуулийн хэлэлцэх эсэхийг шийдчихээд анхны хэлэлцүүлгийг хийхгүй өдий хүрлээ. 

Өнгөрсөн жилийн 11 дүгээр сард ахмадуудтай хийсэн жагсаалын үр дүнд Засгийн газар нэг сарын дараа нийгмийн даатгалын багц хуулийг оруулж ирсэн. Хагас жил болж байхад энэ хуулийн анхны хэлэлцүүлгийг хийхгүй байна.

Энэ УИХ өнгөрсөн хоёр сарын турш зөвхөн өөрсдийнхөө эрх мэдлийн төлөө хуралдлаа. Гишүүдийн тоог нэмэх, жагсаалтын ард нуугдах, амархан сонгогдох хуулийг хэлэлцэж, өөрсдөө эрх мэдэл авахдаа ард түмний цалин, тэтгэврийг багахан нэмэх төсвийн тодотголыг хэлэлцлээ. 

Өнөөдрийн УИХ хөшөөнд 36 тэрбум төгрөг зарцуулж байсан. Ахмадуудаас мөнгө харамладаг атлаа хөшөөнд 36 тэрбум төгрөг зарцуулдаг УИХ байж болохгүй. Тиймээс чих нь бөглөрч, нүд нь боогдсон УИХ-д шахалт үзүүлэх үүднээс 2023.06.19-ны даваа гаригийн 12.00 цагаас ахмадуудтайгаа нийлж, жагсаал хийнэ" гэдгээ мэдэгдэж, жагсаалд ирэхийг ахмадуудад уриаллаа.