УИХ-ын чуулганы нэгдсэн хуралдаанаар 2023 оны төсвийн тодотголыг эцэслэн баталлаа. Энэ талаар УИХ-ын дарга Г.Занданшатар “Энэ удаагийн төсвийн тодотгол чухал ач холбогдолтой. Төсвийн орлого их хэмжээгээр давж биелсэн.

Хүүхдийн мөнгийг 01 дүгээр сараас ялгавартай олгож эхэлсэн. Үндсэн хуулийн нэмэлт өөрчлөлт хэлэлцэж байх үед иргэдийн зүгээс маш буруу тогтолцоо, зарчимтай явж байгааг шүүмжилж байсан. УИХ дээр олон удаагийн хэлэлцүүлэг өрнөсний үр дүнд хүүхэд бүрт, ялгаваргүйгээр Хүүхдийн мөнгийг олгох болж байна.

Цаашид Хүүхдийн мөнгө бол халамж биш. Монгол хүүхэд бүрийн эх орныхоо баялгаас хүртэж байгаа хишиг юм гэдгийг тохиръя.

Биржийн хууль батлагдсан нь улсын төсвийн орлого нэмэгдэхэд үлэмж хувь нэмэр оруулсан. Ард түмний хүссэн, бидний амалсан “Баялагтаа эзэн Монгол”, баялгийн тэгш хуваарилалтын нэг зарчим. Ирээдүйн өв сангаас хүүхдийн мөнгө олгож байна.

Газрын доорх баялгаа иргэддээ хүртээж байх шаардлагатай байна. Тиймээс энэ санаачилга дэвшүүлж байна. АМНАТ гэж хэлэхгүй Баялгийн эрхийн татвар гэж нэрлэе. Баялгийн эрхийн татвараа нэмэгдүүлээд уул уурхайг хариуцлагатай, тогтвортой байхад нь дэмжиж, ард түмэндээ ч өгөөжтэй байх Үндсэн хуулийн зарчмаа хэрэгжүүлье.

Баялгийн хараал биш ерөөл болгохын тулд Үндэсний баялгийн сангийн хуулиа баталж, гадаад, дотоодын шилдэг менежментийн багаар удирдуулж, нүүрсний хулгай гэх эх захгүй юмыг цэгцэлж, ард иргэдэд өгөөж өгье” гэсэн байр суурийг илэрхийлж, Үндэсний баялгийн сангийн хуулийг яаравчлахыг даалгав.