Украины Батлан хамгаалах яамны Тагнуулын ерөнхий газрын дарга Кирилл Буданов өнгөрсөн сарын сүүлээр хүнд шархаджээ. Энэ талаарх мэдээллийг пүрэв гарагт Орос, Украины хэвлэлүүд дамжуулсан байна. 

"РИА Новости"-ийн мэдээлснээр, тавдугаар сарын сүүлээр Киев хотод Тагнуулын ерөнхий газрын төв байранд Оросын тал пуужингийн цохилт өгөх үеэр Кирилл Буднанов хүнд шархадсан байна. Шархадсан Будановыг Герман руу хүргэсэн бөгөөд одоо тэндээ эмчлүүлж байгаа гэнэ. 

"Оросын пуужин Будановын өрөөний хажуугийн өрөөг оносон. Будановыг нуранган дороос гаргасны дараа Украины Зэвсэгт хүчний эмнэлгийн нисэх хүчний нисдэг тэргээр Польшийн Жешув цэргийн бааз руу нүүлгэн шилжүүлсэн. Энэ бааз дээр Будановыг Берлин хүргэхийн тулд АНУ-ын Агаарын цэргийн хүчний агаарын эмнэлгийн нүүлгэн шилжүүлэлтийн эскадрилын 84-0087 онгоц ирсэн юм" хэмээн эх сурвалж мэдээллийн агентлагт өгүүлсэн байна.

Одоо Буданов Берлиний Бундесварын эмнэлэгт эмчлүүлж байгаа бөгөөд биеийн байдал нь хүнд байж болзошгүй гэнэ. Тэрбээр тавдугаар сарын 29-нөөс хойш олны өмнө гарахгүй байгаа. Мөн яг энэ үеэр Оросын цэргүүд Украины шийдэл гаргах төвүүдийн нэг дээр пуужингаар цохилт өгсөн гэсэн мэдээлэл гарч байв. Үүний дараа энэхүү төв нь Киев дэх цэргийн тагнуулын төв байр байсан гэж Путин мэдэгдэж байсан юм. 

Г.Бямбасүрэн