Хойд Солонгосын оршин суугчид ВВС агентлагт ярилцлага өгөхдөө хүнсний хомстол нүүрлэж, хөршүүд нь өлсгөлөнгөөс болж нас барж байгаа талаар ярьжээ. Дэлхийн хамгийн хаалттай орны оршин суугчдаас авч чадсан энэхүү ховор ярилцлага нь Хойд Солонгос 1990-ээд оноос хойш тун хүнд нөхцөлд байгааг илтгэж байна гэж шинжээчид өгүүлсэн байна. 

БНАСАУ-д өөрсдийн гэсэн эх сурвалжийн сүлжээтэй болсон Daily NK-ийн тусламжтайгаар ВВС агентлаг Хойд Солонгосын энгийн иргэдээс нууцаар ярилцлага авч чаджээ. ВВС агентлаг Хойд Солонгосын иргэдээс ярилцлага авахдаа аюулгүй байдлыг нь бодолцон жинхэнэ нэрийг нь бичилгүй, нэр зохиосон байна. Хойд Солонгосын оршин суугчдын өгүүлснээр, хил хааснаас хойш эсвэл өлсгөлөнгөөр эсвэл хууль зөрчсөн гэж цаазлуулахаас аргагүй болно гэж болгоомжилж байгаа гэнэ. Пхеньян хотын оршин суугч эмэгтэй ВВС агентлагт ярихдаа гэртээ өлсгөлөнгийн улмаас нас барсан гурван ам бүлтэй айлыг мэддэг байсан хэмээжээ.

"Бид тэдэнд ус өгөхөөр хаалгыг нь тогшиход хэн ч хаалгаа нээгээгүй" хэмээн Жи Ён ярьсан аж. Харин холбогдох албаныхан гэр рүү нь ороход хөршүүд нь нас барсан байсан гэнэ.

Харин Хятадын хилээс холгүйхэн амьдардаг барилгачин эр тэдний тосгонд таван хүн өлсгөлөнгийн улмаас нас барсан хэмээн ярьжээ.

"Эхлээд би ковидоор нас барна гэж айдаг байлаа. Харин дараа нь өлсгөлөнгөөр амиа алдана гэж айх болсон" хэмээн тэрбээр ярьжээ. 

ВВС агентлагийн онцолсноор, Хойд Солонгос хэзээ ч 26 сая хүн амдаа зориулж хангалттай хэмжээний хүнс үйлдвэрлэх чадвартай байгаагүй гэнэ. 2020 оны нэгдүгээр сард эрх баригчид хилээ хааж, Хятадаас үр тариа, ургацад шаардлагатай бордоо, техник импортлохоо зогсоожээ. Ийнхүү хилээ хаахдаа хилийн хамгаалалтыг чангатгаж, саад, хашлага тавьж, хил нэвтрэх гэсэн хүн бүрийг буудахыг хилчдэд тушаасан гэнэ. Ингэснээр Хойд Солонгосын ихэнх оршин суугчид хоол хүнсээ олж авдаг хар зах дээр борлуулагдах хүнсний хууль бус наймааг эцэс болгосон байна.

ВВС агентлагт ярилцлага өгсөн, зах дээр наймаа эрхэлдэг эмэгтэйн өгүүлснээр, тэдний хотод зах дээр борлуулагдаж буй бүхий л бүтээгдэхүүний 3/4 нь Хятадаас ирдэг байж, харин одоо лангуу хоосорсон гэнэ. Энэ эмэгтэй болон хилийн чанадаас хууль бусаар хүнсний бүтээгдэхүүн зөөж амьдардаг бүх хүн орлогынхоо ихэнх хэсгийг алдсан байна. 

Эмэгтэйн өгүүлснээр, гэртээ болон уул руу явж амиа хорлосон хүмүүсийн тухай яриа ч сонсогдох болсон гэнэ. Учир нь хүмүүс амин зуулгаа дийлэхээ байжээ. Харин эмэгтэй өөрөө арайхийж хүүхдүүдээ тэжээж байгаа, хоёр өдөр дараалан юу ч идээгүй тохиолдол ч байсан, тиймээс унтаж байхдаа нас барах вий гэхээс айж байсан гэнэ.

1990-ээд оны сүүлээр Хойд Солонгос их өлсгөлөнд нэрвэгдэж, гурван сая орчим хүн өлсгөлөнгийн улмаас амиа алдаж байв. ВВС агентлагт ярилцлага өгсөн хүмүүсийн яриа болон өлсгөлөнгийн тухай өөр бусад эх сурвалжуудын мэдээнээс харахад Хойд Солонгос шинэ сүйрлийн ирмэг дээр ирчихснийг илтгэж байна хэмээн сурвалжлагч онцолжээ. 

ВВС агентлагт ярилцлага өгсөн хүмүүс сүүлийн гурван жилд эрх баригчид хүмүүсийн амьдралыг хянах нь эрс нэмэгдсэн, шийтгэлийг чангатгаж, шинээр хууль тогтоомж гаргасан хэмээсэн байна. Өмнөд Солонгосын засгийн газрын мэдээлснээр, цар тахлаас өмнө Хойд Солонгосоос Ялужян голыг дамжин жил бүр 1000 гаруй хүн Хятад руу зугтдаг байжээ. Харин одоо ийн зугтах ямар ч боломжгүй болсон гэж Хойд Солонгосын оршин суугч Мён Сук ВВС-д ярьсан байна.

"Одоо зүгээр л энэ гол руу ойртох л юм бол хатуу шийтгэл хүлээнэ. Тиймээс гол гатлан зугтах эрсдэл хийх хүн бараг байхгүй" хэмээн Мён Сук өгүүлжээ. Харин барилгачин Чхан Хогийн өгүүлснээр, түүний танилын хүү нь хэд хэдэн цаазын ял гүйцэтгэлийн гэрч болсон гэнэ. Тухай бүрт 3-4 хүнийг улсаасаа зугтах гэснийх нь төлөө цаазалжээ.

ВВС агентлагийнхан оршин суугчидтай ярилцсаны дараа тэдний өгсөн мэдээлэлтэй холбоотойгоор БНАСАУ-ын Засгийн газраас тайлбар хүссэн байна. Энэ хүсэлтийн хариуд Хойд Солонгосын Засгийн газар "үргэлж, хамгийн хэцүү үед ч ард түмнийхээ ашиг сонирхлыг нэгдүгээрт тавьдаг" хэмээн хариулжээ. Мөн сэтгүүлчдийн олж авсан мэдээлэл нь "үнэн бодит байдалд огт нийцэхгүй", эдгээр мэдээллийг "Солонгосын эсрэг хүчний зүгээс гаргасан хуурамч мэдээлэл" гэж Хойд Солонгосын эрх баригчид мэдэгдсэн гэнэ.