АНУ-ын Төрийн нарийн бичгийн дарга Энтони Блинкен Хятадад айлчлахаар болсон мэдээлэл гарсны араас үүнийг няцаасан мэдээллүүд ч гарч байлаа. Харин энэ удаад Хятадын хэвлэлүүд Блинкен Бээжинд айлчилна гэдгийг баталжээ. 

АНУ-ын Төрийн нарийн бичгийн дарга Энтони Блинкений айлчлал энэ сарын 18-19-нд болох аж. Мөн энэ мэдээллийг АНУ-ын Төрийн департамент ч баталж, айлчлалын хүрээнд Блинкен БНХАУ-ын өндөр албан тушаалтнуудтай уулзаж Украин дахь сөргөлдөөнийг шийдвэрлэх асуудлууд зэрэг олон сэдвээр хэлэлцээ хийнэ гэж онцолжээ. 

Үүний зэрэгцээ БНХАУ Оростой харилцаагаа хөгжүүлэх шийдвэр гаргасан, Тайванийн хоолойд гаргаж буй Бээжингийн үйлдэлд санаа зовниж байгаагаа Блинкен илэрхийлэх гэнэ. Блинкен Ойрх Дорнодоор хийх айлчлалаа дуусгасныхаа дараа Бээжинг зорих аж. Ингэснээр энэ айлчлал нь 2018 оноос хойш Америкиийн өндөр албан тушаалтан Хятадад айлчилсан анхны тохиолдол болох юм.

Г.Бямбасүрэн