"Хүйс солих эмнэлгийн мэс засал хийхийг хориглох, мэс засалгүйгээр хүйс сольсныг улсын бүртгэлд бүртгэхгүй байх" тухай тусгасан хуулийн төслийг Оросын Төрийн дум зургадугаар сарын 14-ний өдөр эхний хэлэлцүүлгээр дэмжжээ. Энэ хуулийн төслийг Думын бүх фракцийн 400 орчим гишүүн санаачилсан гэж DW мэдээлжээ. 

Энэ хуулийг эцэслэн баталвал Орост хүйс солихыг бүрэн хориглох юм. Гэхдээ хүүхэд төрөлхийн эмгэгтэй төрсөн бол хүйс солихыг зөвшөөрөх бөгөөд энэ эмгэгийн жагсаалтыг засгийн газар батлах аж. Улмаар хүйс солих мэс засал хийх зөвшөөрлийг Холбооны эрүүл мэндийн улсын байгууллагын эмч нарын комисс өгөх гэнэ.

Думын орлогч дарга Петр Толстойн мэдэгдсэнээр, Орост хүйс солих явдал эрс өсөж байгаа бөгөөд 2016-2022 оны хооронд 3000 хүн хүйс солиулах мэс засалд оржээ. Түүний өгүүлснээр, Оросын бараг бүх хувийн эмнэлэгт хүйс солих мэс ажилбар хийх зөвшөөрөл өгсөн нь энэ байдал хавтгайрч, аюултай, эрсдэлтэй байдалд хүрээд байгаа гэнэ.

Г.Бямбасүрэн