Италийн Ерөнхий сайд агсан Сильвио Берлускони зургадугаар сарын 12-ны өдөр 86 насандаа цусны хорт хавдрын улмаас таалал төгссөн юм. Түүнийг сүүлчийн замд нь үдэх төрийн ёслол зургадугаар сарын 14-ний өдөр Миланд болжээ. 

МИР24 телевизийн мэдээлснээр, гашуудлын ёслол "Сан-Мартино" виллагаас эхэлж, шарилыг Европ дахь томоохон сүмүүдийн нэг болох Миланы сүм рүү хүргэсэн байна. Сүмийн урд талын талбайд Берлусконитой салах ёс хийхээр 10 мянга гаруй хүн цуглажээ.Цугласан олон "Цорын ганц л Ерөнхийлөгч бий" гэж хашгирч байсан талаар эх сурвалж дамжуулсан байна. Гэхдээ Сильвио Берлускони Италийн Ерөнхийлөгч байгаагүй, харин энэ улсын засгийн газрыг дөрвөнтөө тэргүүлсэн юм.

Берлускониг сүүлчийн замд нь үдэх өдөр буюу зургадугаар сарын 14-нд Италид Үндэсний хэмжээний гашуудал зарласан. Улс орон даяар төрийн далбааг бөхийлгөж, парламентын гишүүдийн ажлыг түр зогсоожээ. Берлускониг үдэх өдрийг Үндэсний хэмжээний гашуудал болгон зарласан нь ерөнхий сайд асан хүнийг таалал төгссөнтэй холбогдуулан үндэсний гашуудал зарлаж байгаа анхны тохиолдол аж.

Г.Бямбасүрэн