Нидерландын их дээд сургуулиуд техникийн чиглэлээр Хятадаас оюутан элсүүлэхээ зогсоох гэж байгаа талаар олон улсын хэвлэлүүд мэдээлжээ.

Блүмберг агентлагийн мэдээлснээр, өндөр технологитой холбоотой мэргэжлээр Хятадын оюутнуудыг Нидерландын их дээд сургуульд элсэхийг хориглосон хуулийн төслийг Нидерландын эрх баригчид боловсруулж байгаа гэнэ. Нэн тэргүүнд батлан хамгаалахын аж үйлдвэр, хагас дамжуулагчийн салбартай холбоотой мэргэжлүүдээр Хятадаас оюутан элсүүлэхгүй байхаар хуулийн төсөлд тусгасан байна.

Хэвлэлүүдийн онцолсноор, хуулийн төсөлд Хятадын оюутнууд гэж онцгойлон тусгаагүй ч энэ хууль чухамхүү тэдний эсрэг үйлчлэх гэнэ. Ийм хуулийн төсөл боловсруулах болсон нь Нидерландын тэргүүлэх технологийг Хятадын иргэд эзэмших боломжийг хязгаарлах, улмаар суралцах явцдаа олж авсан мэдээллийг Хятадын эрх баригчдад шилжүүлэхээс болгоомжилсонтой холбоотой аж. 

Г.Бямбасүрэн