Зургадугаар сарын 13-ны өдөр Оросын Ерөнхийлөгч Владимир Путин цэргийн сурвалжлагчидтай уулзжээ. Тэрбээр энэ үеэрээ "дэлхийн III дайнд ялагч гэж байхгүй" хэмээн мэдэгдсэнийг ТАСС дамжуулсан байна.
Оросын төрийн тэргүүний мэдэгдсэнээр, АНУ сөргөлдөөн хурцдахаас айхгүй мэт дүр эсгэж байгаа ч энэ улсад өнөөгийн сөргөлдөөний аюулыг ойлгож байгаа олон хүн бий гэнэ.
"Тэнд эрүүл саруулаар сэтгэдэг олон хүн бий. Тэд нөхцөл байдлыг дэлхийн гуравдугаар дайнд хүргэхийг хүсэхгүй байгаа нь илт. Ийм дайнд ялагч гэж байхгүй, тэр дундаа АНУ ялахгүй" хэмээн онцолжээ.
Энд дуулгахад, АНУ Их Британийн араас Украин руу Абрамс танканд зориулж шавхагдсан урантай сум нийлүүлэхээр төлөвлөж байгаа гэх мэдээлэл гарсан юм. Үүний хариуд Путин Орос ч ийм зэвсгийг хариу болгон ашиглах эрхтэй хэмээн мэдэгдэж байв. Тэрбээр, Орост ч шавхагдсан урантай зэвсэг байгаа ч ийм сум аюултай тул огт ашиглаагүй, ашиглах ч хүсэлгүй байгаа хэмээн онцолж байсан юм.
Г.Бямбасүрэн
| Уншиж байна |