Оросын цэргийн нисгэгч Украины эсрэг дайнд оролцохоос татгалзаж, Европын холбоо руу дүрвэжээ. Одоо Литва улсын эрх баригчид түүнд орогнол олгох асуудлыг хэлэлцэж байгаа бөгөөд эцсийн шийд гарах хүртэл Литвад үлдэхийг зөвшөөрсөн талаар DW мэдээлсэн байна.

Эх сурвалжийн мэдээлснээр, эрх баригчид нисгэгч Дмитрий Мишовын орогнол олгох хүсэлтийг эцэслэн шийдэх хүртэл Литва улсад дуртай газраа түр оршин суухыг Дотоод хэргийн яамны дэргэдэх Цагаачлалын газар зөвшөөрсөн байна. Дэслэгч Дмитрий Мишов тавдугаар сарын 28-ны өдөр Оросын хилийг хууль бусаар нэвтэрч, зургадугаар сарын наймны өдөр Литва улсын албаныханд бууж өгчээ. 

Тэрбээр Псков муж дахь цэргийн ангид алба хааж байсан гэнэ. Орос Украин руу халдсаны дараа байлдааны ажиллагаанд оролцоогүй, Украины нутаг дэвсгэр рүү нэг ч удаа нисээгүй, гэхдээ Ми-26 нисдэг тэргээр ОХУ-ын армийн ачааг зөөн Беларусийн нутаг дэвсгэр дээгүүр ниссэн гэж Мишов өгүүлсэн байна. 

Г.Бямбасүрэн