Хөвсгөл аймгийн Засаг даргаар П.Лхагважавыг батламжилжээ. Тус аймгийн ИТХ-ын 01 дүгээр тогтоолоор төлөөлөгч Пилжээгийн ЛХАГВАЖАВЫГ аймгийн Засаг даргад нэр дэвшүүлж, 100 хувийн саналаар сонгожээ. ИТХ-ын шийдвэрийг Ерөнхий сайд Л.Оюун-Эрдэнэд уламжилж, өчигдөр батламжилсан байна. 

Хөвсгөл аймгийн Засаг дарга П.Лхагважав “...Хөвсгөл аймгийн ИТХ-аас 100 хувийн дэмжлэг авч, Ерөнхий сайдын захирамжаар Хөвсгөл аймгийн Засаг даргаар томилогдож байна. 2020 оны сонгуулийн үр дүнгээр хөвсгөлчүүд Ардчилсан намд итгэл үзүүлэн сонгосон билээ. Би тэр итгэлийг өвөртлөн ард иргэдийнхээ төлөө оновчтой бодлого, зөв төлөвлөлт, Засаг даргын үйл ажиллагааны хөтөлбөр, алсын хараа 2050, Шинэ сэргэлтийн бодлого гээд олон бодлоготой уялдуулж ажиллаж болно. Төрийн байгууллагын ажил нь иргэдэд шударга бөгөөд авлига ашиг сонирхлоос ангид хүнд сурталгүй байх ёстой үүн дээр онцгой анхаарч ажиллана. Мөн татвар төлөгчдийн мөнгө болох улсын болон орон нутгийн төсвийн оновчтой зүйл чиглүүлэн ажиллах болно. Хөвсгөл аймгийн иргэдийн өмнө тулгамдсан асуудлыг боломжит хэмжээгээр шийдвэрлэн ажиллаж, хувийн хэвшил ИНБ-ын санал санаачилгыг хэрэгжүүлэн ажиллана" гэдгээ илэрхийлжээ.