Оросын Төрийн думд  хорих газруудаас хоригдлуудыг тэнсэн харгалзах ялтайгаар чөлөөлөх хуулийн төслийг өргөн барьжээ. Энэ талаар Оросын хэвлэлүүд мэдээлсэн байна.

Хуулийн төслийг баталснаар хоригдлуудыг тэнсэн харгалзах ялтайгаар чөлөөлж, улмаар Батлан хамгаалах яам тэднийг армид гэрээгээр элсүүлж, эсвэл шинээр дайчилгаа зарлавал цэрэгт татах боломжтой болох гэнэ. Энэ хуулийн дагуу чөлөөлөгдсөн ялтнууд Украины дайнд оролцон байлдаж, төрийн шагнал хүртэх эсвэл армиас халагдах хүртлээ алба хаасан тохиолдолд ялыг нь хэрэгсэхгүй болгох аж.

"Тусгай цэргийн ажиллагаанд оролцох этгээдүүдийн эрүүгийн хариуцлагын онцлогын тухай" холбооны хуулийн төслийг Думын хот байгуулалт, хууль тогтоомжийн хороодын дарга нар болон хэд хэдэн гишүүн хамтран боловсруулж, Төрийн думд өргөн барьжээ.

Энэ хуулийн төсөлд дайчлагдсан эсвэл Батлан хамгаалах яамтай гэрээ хийсэн ялтнуудыг хорих газраас тэнсэн харгалзах ялтайгаар чөлөөлөх тухай тусгасан байна. Түүнчлэн шийтгэл нь таваас дээшгүй жилийн хорих ялтай, хөнгөн болон хүндэвтэр хэрэгт татагдсан хүмүүсийн мөрдөн байцаалтыг зогсоож, сэжигтэн, ялтнуудыг урьдчилан саатуулах газраас суллах боломжтой хорих газраас суллах боломжтой болох аж. Ингэснээр хулгай, дээрэм, луйвар, зарим тохиолдолд хүний амь нас, эрүүл мэндийн эсрэг үйлдэгдсэн гэмт хэргийн сэжигтнүүд эрх чөлөөгөө олж авахын тулд дайны фронт руу явах болох нь. 

Төрийн думд өргөн барьсан хуулийн төсөлд чухам ямар хэрэг үйлдсэн этгээдүүдийг нөхцөлтэйгээр суллах талаар нарийвчлан тусгаагүй. Гэхдээ Оросын хэвлэлүүдийн мэдээлж байгаагаар насанд хүрээгүйчүүдийн бэлгийн халдашгүй байдлын эсрэг үйлдэгдсэн гэмт хэрэг, түүнчлэн экстремист болон террорист ажиллагааны сэжигтнүүдээс бусад бараг бүх зүйл заалтаар ял сонсох, сонссон этгээдүүд суллагдах боломжтой аж.

Орост шорон, урьдчилан саатуулах газруудад хоригдож байгаа этгээдүүдийг дайчлахыг хориглосон хууль үйлчилж байсан ч 2022 оны 11 дүгээр сараас эхлэн хүн амины хэрэг, дээрэм, тонуул, хар тамхины хэргээр ял сонссон хүмүүсийг дайчлахыг хориглосон заалтыг хүчингүй болгосон юм.

Хэдийгээр цаасан дээр энэ хоригийг цуцлаад удаагүй ч үүнээс ч өмнө Оросын хоригдлууд Украинд дайтсаар ирсэн. Тодруулбал, Оросын Ерөнхийлөгчийн ойрын хүн гэгддэг Евгений Пригожиний Вагнер групп хорих ангиудаар явж, хоригдлуудыг гэрээт цэргээр элсүүлж байлаа. 

Ийнхүү цэрэгт элсүүлэхдээ хоригдлуудыг зургаан сарын дараа өршөөнө гэж Пригожин амлаж байсан талаар Оросын хараат бус хэвлэлүүд мэдээлж байв. Үнэн хэрэгтээ,Вагнера компанийн бүрэлдэхүүнд орж Украин руу дайтахаар явсан хоригдлуудыг   Владимир Путин фронт руу явахаас нь өмнө өршөөсөн гэж Оросын Хүний эрхийн зөвлөлийн гишүүн Ева Меркачева мэдэгдэж байлаа. 

Түүний өгүүлснээр, хоригдлуудыг хорих газраас гаргахын өмнө ялаас нь хэлтрүүлэх бөгөөд гэхдээ өршөөл үзүүлэх явц болон Оросын Ерөнхийлөгчийн зарлиг зэрэг нь төрийн нууцад хамаардаг гэнэ.

"Хамгийн эхэнд суллагдсан хүмүүсийн ойр дотны хүмүүстэй би уулзсан. Тэдний баталж байгаагаар, тэдэнд долдугаар сарын тавны өдөр гарын үсэг зурсан баримт байгаа гэсэн. Ингээд долдугаар сарын тавны өдөр болон маргааш нь эдгээр хүмүүсийг хорих газраас гаргасан байна билээ" хэмээн Меркачева өгүүлж байв.. 

Хагас жилийн гэрээ байгуулж, мөн хугацаанд дайнд оролцсоны дараа ялаас чөлөөлнө гэж амлан, элсүүлсэн хоригдлууд Эдгээр хоригдлууд Украины дайнд олноор амиа алдсан талаар хэвлэлүүд мэдээлж байсан. Өнгөрсөн сарын сүүлээр Вагнер группийг үндэслэгч Евгений Пригожин хэвлэлд ярилцлага өгөхдөө  Украин дахь дайнд Вагнер группийн 20 мянган хөлсний цэрэг амиа алдсаны тал нь хөлсний цэргээр элссэн хоригдлууд байсан хэмээсэн юм.  

Г.Бямбасүрэн